Sleep Routine : अपुऱ्या झोपेचे परिणाम, शरीर - मनाला जाणवतो थकवा, जाणून घ्या स्लीप रुटिन टिप्स

केवळ पुरेशी झोप घेणं पुरेसं नाही तर शरीराला निरोगी आहार, तणावमुक्त मन आणि हायड्रेशनमधून खरी ऊर्जा मिळते. छोटे बदल केल्यानं तुम्हाला सकाळचा थकवा दूर होण्यास मदत होऊ शकते.

झोपेची गुणवत्ता खराब होते - पुरेशी झोप घेणं आवश्यक आहे, पण वारंवार झोप खंडित होत असेल किंवा गाढ झोप येत नसेल तर शरीर योग्यरित्या रिचार्ज होऊ शकत नाही. म्हणूनच सकाळी थकवा जाणवतो. यासाठीचा उपाय म्हणजे, झोपण्यापूर्वी फोन/लॅपटॉपपासून दूर रहा. खोली अंधारी आणि शांत ठेवा, दररोज त्याच वेळी झोपा आणि उठण्याची सवय लावा.

चुकीच्या खाण्याच्या सवयी - रात्री जड किंवा तेलकट अन्न खाल्ल्यानं पचनक्रिया मंदावते आणि झोपेत अडथळा येतो. यामुळे दुसऱ्या दिवशी सकाळी ताजेतवाने वाटत नाही. हे टाळण्यासाठी रात्रीचं जेवण हलकं आणि लवकर करा. मसालेदार आणि तेलकट पदार्थ टाळा. जेवणानंतर थोडं फिरा.

डिहायड्रेशन - शरीरात पाण्याची कमतरता हे देखील थकवा आणि आळसाचं एक प्रमुख कारण आहे.  सकाळी उठल्यानंतर पाणी प्यायलं नाही तर तुमचा मेंदू आणि स्नायू आळशी होतात. यासाठी सकाळी उठताच एक ग्लास कोमट पाणी प्या. दिवसभरात किमान आठ-दहा ग्लास पाणी प्या.

जीवनसत्त्वं आणि खनिजांची कमतरता - पुरेशी झोप असूनही व्हिटॅमिन डी, बी12 किंवा लोहाच्या कमतरतेमुळे थकवा येऊ शकतो. हे टाळण्यासाठी, नियमित आरोग्य तपासणी करा. आहारात हिरव्या भाज्या, सुकामेवा आणि प्रथिनांचा समावेश आहे याची खात्री करा. डॉक्टरांच्या सल्ल्यानुसार पूरक आहार म्हणजेच सप्लिमेंटस घ्या.

ताण आणि मानसिक थकवा - मानसिक ताण आणि चिंतेमुळे शरीराला योग्य विश्रांती मिळत नाही. याचा परिणाम दुसऱ्या दिवशी झोप आणि उर्जेच्या पातळीवर होतो. यावर उपाय म्हणून, ध्यान आणि श्वासोच्छवासाचे व्यायाम करा. स्क्रीन वेळ मर्यादित ठेवा.