Minimalism : मिनिमलिस्ट जीवनशैलीचा वाढतोय ट्रेंड, जगण्याचा सुटसुटीत मंत्र, साधी राहणी, उच्च विचारसरणी

ग्लॅमरस आणि लक्झरीपासून दूर जाऊन साधं, शांत जीवन जगण्याला पसंती मिळते आहे. मिनिमलिस्ट जीवनशैलीमधे कमी घरगुती वस्तू, कमी खर्च आणि अधिक शांततेला प्राधान्य असतं. हा साधेपणा निवडण्याचं कारण त्यातून मिळणारं समाधान आहे की वाढती महागाई ? हे ज्याच्या त्याच्या जीवनशैलीवर अवलंबून आहे.

मिनिमलिस्ट जीवनशैलीचा ट्रेंड आता सुरू झालेला नाही. ही परंपरा अनेक वर्षांपासून आहे. भारतात 'साधी राहणी, उच्च विचारसरणी'ची परंपरा आहे. पूर्वीच्या काळात लोक फक्त आवश्यक आणि उपयुक्त वस्तूच ठेवत असत. त्याचं महत्त्व आता परत पटताना दिसतंय.

विलासी जीवनशैली - लक्झरी लाईफस्टाईल - सध्या, अनेक जण त्यांचं काम सोपं करण्यासाठी विविध गोष्टींवर अवलंबून असतात. घर स्वच्छ करण्यासाठी मदतनीस किंवा रोबोटिक क्लिनर खरेदी करणं असो, जीवन सोपं करण्यासाठीची ही उपकरणं आहेत. घरकाम करणाऱ्यांना कामांबद्दल सूचना देणं आवश्यक आहे आणि रोबोटला सेट करणं आवश्यक आहे. या सगळ्याला टाळत, अनेकांना कमी वस्तूंसह राहणं अधिक आरामदायक वाटतंय.

मिनिमलिस्ट जीवनशैली आवडण्याचं कारण म्हणजे, घरात आणि जीवनात अनावश्यक गोष्टी कमी असतात, त्यामुळे त्यांना हलकं वाटतं. ताणतणाव कमी जाणवतो. यामुळे त्यांना महत्त्वाच्या कामांवर अधिक लक्ष केंद्रित करता येतं. म्हणूनच लोक अनावश्यक खर्च टाळत आहेत.

काही लोक ही जीवनशैली निवडीनुसार स्वीकारत असले तरी, काहींसाठी हा ट्रेंड नसून सक्ती असू शकते. वाढती महागाई, शहरी खर्च आणि वेगवान जीवनशैलीमुळे, विलासी जीवन जगणं प्रत्येकासाठी सोपं नाही. लोक कमी गोष्टींसह जगणं शिकत आहेत याचे हे एक कारण आहे.

सोशल मीडियावरही क्रेझ

काही सेलिब्रिटींची आलिशान घरं आणि वस्तू सोशल मीडियावर दिसतात. तर काहीजण मिनिमलिस्ट जीवनशैली अंगिकारतात. त्याचाही प्रभाव फॉलोअर्सच्या आयुष्यात जाणवत असतो.

थोडक्यात, फाफट पसारा न वाढवता, आवश्यक आणि उपयुक्ततेला महत्त्व देणं हेच मिनिमलिस्ट जीवनशैलीचं वैशिष्ट्य आहे.