फक्त पिंपल नाही, चेहऱ्यावर दिसले 'हे' बदल की लगेच जावं डॉक्टरांकडे, असू शकतो गंभीर आजार

झांसी : चेहऱ्यावर एकही पिंपल नसावा, डाग नसावा, त्वचा कोरडी पडलेली नसावी, चेहरा छान तजेलदार, टवटवीत दिसावा यासाठी प्रत्येक व्यक्तीचे प्रयत्न सुरू असतात. मग त्यासाठी अनेकजण वेगवेगळ्या महागड्या क्रीम्स वापरतात. परंतु तुम्हाला माहितीये का? महागड्या क्रीम्सचा आपल्या चेहऱ्यावर जेवढा फरक दिसून येत नाही, तेवढा निरोगी शरिराचा दिसून येतो. म्हणजेच आपल्या शरिरातले अवयव, रसायनं सुरळीत असतील, तरच चेहऱ्यावर तेज येतं.

विशेषतः पोट साफ नसेल, अन्नपचन व्यवस्थित होत नसेल, तर त्याचा परिणाम लगेच चेहऱ्यावर दिसतो. चेहऱ्यावर अचानक पिंपल यायला सुरूवात झाली किंवा त्वचा कोरडी पडू लागली की समजून जायचं, अन्नपचन व्यवस्थित होत नाहीये. अशावेळी तातडीने डॉक्टरांकडे जावं.

स्किन एक्स्पर्ट डॉ. दीपशिखा सिंह सांगतात की, पोटच नाही, तर यकृत किंवा इतर कोणत्याही अवयवाचं कार्य सुरळीत नसेल, तरी त्याचाही परिणाम लगेच त्वचेवर दिसतो. सर्वात आधी पिंपल येतात, मग त्वचा लाल पडू लागते आणि मग कोरडी होते. शरिरातला आजार गंभीर होण्यापूर्वीच त्यावर उपचार घेणं कधीही चांगलं. त्यामुळे अशी कोणतीही लक्षणं दिसली तर त्यांकडे अजिबात दुर्लक्ष करू नका.