टोफू की पनीर? शाकाहारींसाठी कोणता पर्याय आहे जास्त पौष्टिक? एक्स्पर्ट सांगतात की...

डायट मंत्रा क्लिनिकच्या वरिष्ठ आहारतज्ज्ञ कामिनी सिन्हा यांनी न्यूज18 ला सांगितलं की, पनीर गायी आणि म्हशीच्या दुधापासून बनवलं जातं, तर टोफू सोयाबीनच्या दुधापासून तयार होतं. टोफू पूर्णपणे वनस्पती-आधारित उत्पादन आहे, तर पनीर दुग्धजन्य पदार्थ आहे. दोन्हीमध्ये प्रोटीन आणि कॅल्शियम भरपूर प्रमाणात असतं. 100 ग्रॅम पनीरमध्ये सुमारे 25 ग्रॅम प्रोटीन असतं, तर 100 ग्रॅम टोफूमध्ये सुमारे 17 ग्रॅम प्रोटीन असतं. टोफूमध्ये पनीरपेक्षा कमी कॅलरीज असतात. टोफूमध्ये फायबर, लोह आणि पोटॅशियमचं प्रमाण पनीरपेक्षा जास्त असतं. पनीरमध्ये टोफूपेक्षा जास्त फॅट असतं.

आहारतज्ज्ञांच्या मते, पनीर आणि टोफू दोन्ही हेल्दी प्रोटीनचे स्रोत आहेत. त्यांचं सेवन केल्याने स्नायू आणि हाडं मजबूत होतात. मात्र, टोफूमध्ये आढळणारे आयसोफ्लाव्होन्ससारखे वनस्पतीजन्य घटक हृदयविकार, हाडांचे आजार यांसारख्या अनेक रोगांना प्रतिबंध करतात. पनीरमध्ये हे वनस्पतीजन्य घटक नसतात. जर तुम्ही शाकाहारी असाल, तर पनीर आणि टोफू दोन्ही तुमच्यासाठी चांगले पर्याय आहेत. जर तुम्ही पूर्णपणे वनस्पती-आधारित (Vegan) डाएट घेत असाल, तर तुम्ही टोफू खाऊ शकता.

आता प्रश्न हा आहे की, पनीर आणि टोफूमध्ये जास्त फायद्याचं काय आहे? यावर कामिनी सिन्हा यांनी सांगितलं की पनीर आणि टोफू दोघांचेही स्वतःचे फायदे आहेत. पनीरमध्ये जास्त प्रोटीन आणि कॅलरीज असतात. यामुळे वजन वाढण्यास किंवा स्नायू बनण्यास मदत होऊ शकते. दुसरीकडे, टोफू कमी कॅलरीज असलेलं, फायबरयुक्त वनस्पती-आधारित अन्न आहे, जे वजन कमी करण्यासाठी आणि हृदयाच्या आरोग्यासाठी जास्त चांगलं मानलं जातं. तुम्ही तुमच्या डाएट, जीवनशैली आणि फिटनेसच्या ध्येयांनुसार यापैकी कोणतीही गोष्ट निवडू शकता.