४८ तासांत हवामानात होणार मोठे बदल, वादळाचा इशारा कोकणसह या जिल्ह्यांमध्ये पावसाचा अलर्ट

हवामान तज्ज्ञ स्वर्णाली मजूमदार यांनी दिलेल्या माहितीनुसार हवामानातील या बदलांमागे समुद्रातील हालचाली कारणीभूत आहेत. मलेशिया आणि आसपासच्या भागांमध्ये तयार झालेला कमी दाबाचा पट्टा आता अधिक तीव्र होऊन डीप डिप्रेशनमध्ये रूपांतरित झाला आहे. याव्यतिरिक्त, दक्षिण-पश्चिम बंगालच्या उपसागरातही कमी दाबाचा आणखी एक पट्टा तयार झाला आहे. समुद्रातील या दोन मोठ्या घडामोडींमुळे हवामानात मोठे फेरबदल झाले आहेत. याचा थेट परिणाम म्हणून, पुढील पाच दिवस दक्षिण भारतात अतिवृष्टीचा इशारा देण्यात आला आहे.

दक्षिण भारतातील या बदलांचा परिणाम महाराष्ट्रावरही पडणार आहे. पावसासाठी पोषक वातावरण तयार झाल्यामुळे, पुढच्या ४८ तासांमध्ये महाराष्ट्रातील काही भागांत पावसाच्या सरींची शक्यता आहे. प्रामुख्याने कोकण आणि मध्य महाराष्ट्राच्या किनारपट्टीच्या भागात दक्षिणेकडील राज्यांप्रमाणे पावसाच्या हलक्या सरी बरसण्याची शक्यता आहे. नागरिकांना मोठा दिलासा देणारी गोष्ट म्हणजे, सध्या तरी महाराष्ट्रात मुसळधार पावसाचा कोणताही मोठा इशारा हवामान विभागाने दिलेला नाही.

राज्याच्या वेगवेगळ्या भागांत हवामानाचा लहरीपणा दिसून येत आहे. एकीकडे कोकण आणि मुंबईतील लोक उकाड्याने हैराण आहेत, तर दुसरीकडे विदर्भात किमान तापमान तुलनेने कमी झाले आहे. विदर्भात किमान तापमान १३ अंश सेल्सिअसपर्यंत खाली आलेले असले तरी, राज्यातील कमाल तापमान मात्र ३५ अंश डिग्रीपर्यंत नोंदवले गेले आहे. दिवसा होणारी ही वाढलेली उष्णता नागरिकांसाठी मोठी गैरसोय ठरत आहे.