Eknath Shinde : ठाकरेंनंतर आता नंबर भाईंचा? महापालिका निवडणुकीआधी भाजपच्या गोटात हालचाली

राज्याच्या दौऱ्यावर आलेल्या अमित शाह यांनी मुंबईतही वास्तव्य केले. शिवसेना शिंदे गटाचे मुख्य नेते आणि उपमुख्यमंत्री एकनाथ शिंदे यांनी सह्याद्री अतिथीगृहावर अमित शाह यांची मंगळवारी सकाळच्या सुमारास भेट घेतली. या भेटीत दोन्ही नेत्यांमध्ये राज्यातील आगामी निवडणुकांबाबतही चर्चा झाल्याची माहिती आहे. एकनाथ शिंदे यांनी अमित शाह यांच्याकडे मुंबई महापालिकेतील 227 पैकी 107 जागांची मागणी केल्याची माहिती सूत्रांनी दिली. आपल्याकडे 107 उमेदवार असल्याची माहिती शिंदे यांनी शाह यांना दिली. शाह यांनी शिंदे यांचे म्हणणे ऐकून घेतले मात्र त्यांना कोणतेही ठोस आश्वासन दिले नसल्याचे सूत्रांनी सांगितले. भाजपकडून मुंबई, ठाणे आणि पुण्यात स्वबळावर निवडणूक लढवण्यावर चाचपणी सुरू आहे. भाजपने स्वबळासाठी आधीच तयारी केली आहे.

भाजपने मुंबईसह ठाण्याचा गड सर करण्यासाठी जोरदार तयारी सुरू केली आहे. पक्ष फुटीनंतर मुंबईत शिवसेना ठाकरे गट दुबळा झाल्याचे चित्र आहे. तर, भाजपची राजकीय ताकद चांगलीच वाढली आहे. तर, दुसऱ्या बाजूला ठाण्यातही भाजपने गेम प्लान करून एकनाथ शिंदेंच्या कोंडीचे प्रयत्न सुरू केले आहेत. मंत्री गणेश नाईक यांना ठाण्यात बळ देत शिंदे गटावर कुरघोडी करण्यास सुरुवात केली आहे. तर, दुसऱ्या बाजूला आमदार संजय केळकर यांनी ठाण्यातील नगरसेवक आपल्या गळाला लावण्यास सुरुवात केली आहे. यातून भाजप आपली ठाण्यात ताकद वाढवत आहे. मुंबईसह ठाण्यातही आपलाच महापौर बसावा यासाठीचे प्रयत्न करत आहेत. एकनाथ शिंदे यांचे ठाण्यात मोठं वर्चस्व आहे. हे वर्चस्व मोडित काढण्यासाठी भाजपने आखणी केली आहे. एकनाथ शिंदे यांची ठाणे महापालिकेतील सत्ता गेल्यास त्यांची राजकीय कोंडी होण्याची शक्यता आहे. त्यामुळे मुंबईपेक्षा होमग्राउंड राखणं अधिक आव्हानात्मक असणार आहे. त्यामुळे उद्धव ठाकरे यांच्यानंतर आता शिंंदेंचा नंबर असल्याच्या चर्चांना उधाण आले आहे.

अमित शाह यांनी राज्यातील स्थानिक स्वराज्य संस्थांच्या निवडणुकीचा आढावा घेतला. शाह यांनी मुंबई, ठाणे, पुणे महापालिका निवडणुका स्वबळावर लढवण्याबाबतची चाचपणी करण्याचे निर्देश भाजप नेत्यांना दिल्याची माहिती सूत्रांनी सांगितले. या महत्त्वाच्या तीन शहरांसोबत आणखी काही महापालिकांमध्ये स्वबळावर लढण्याची परिस्थिती आणि त्यातून यश मिळण्याची शक्यता किती, याचा आढावा घेण्याची सूचना शाह यांनी केली असल्याचे सूत्रांनी सांगितले.