Nilesh Ghaywal: १७ गुन्हे दाखल असूनही निलेश घायवळच्या 'स्वच्छ चारित्र्यावर' शिक्का, नाकाने कांदे सोलणारे अहिल्यानगर पोलीस तोंडावर पडले

पासपोर्ट मिळविण्यासाठी पोलिसांचा चारित्र्य पडताळणी अहवाल अत्यावश्यक असतो. निलेश घायवळ याने मूळ पत्ता अहिल्यानगर जिल्ह्याचा दिलेला होता. त्यामुळे अहिल्यानगर पोलिसांची भूमिका या प्रकरणात निर्णायक मानली जात होती. नामचिन गुंड असूनही अहिल्यानगर पोलिसांनी पडताळणी अहवाल सकारात्मक कसा दिला असे विचारून त्यांचा अहवाल संशयाच्या घेऱ्यात होता. मात्र घावळ पासपोर्ट प्रकरणात आम्ही कोणताही अहवाल दिला नाही, असे अहिल्यानगर पोलिसांनी स्पष्ट करीत पोलीस पडताळणी होण्याअगोदर निलेश घायवळला पुण्यातून पासपोर्ट अदा झाला, असा सनसनादी दावा केला. मात्र आता समोर आलेल्या अहवालानुसार पोलिसांनीच घायवळ याच्यावरील गुन्हे लपवून केवळ अर्जदार मूळ पत्त्यावर हजर नाही, असा शेरा देऊन पळवाट काढल्याचे दिसून येते. विशेष म्हणजे अहिल्यानगर पोलिसांनी एकप्रकारे निलेश घायवळ याचे स्वच्छ चारित्र्य आहे, असेच अहवालाच्या माध्यमातून अप्रत्यक्षपणे सांगण्याचा प्रयत्न केला.

तत्काळ पासपोर्ट काढायचा असेल तर पोलीस अधिकाऱ्याचे शिफारसपत्र अत्यावश्यक असते. घायवळच्या तत्काळ पासपोर्ट प्रकरणात कोणत्या आयपीएस अधिकाऱ्याने शिफासपत्र दिले? त्याचे नाव का समोर येत नाही? हा कळीचा प्रश्न आहे.

अहिल्यानगर पोलीस अधीक्षक सोमनाथ घारगे यांना न्यूज १८ लोकमतने या सगळ्यावर विचारले असता, घायवळ याच्या मूळ पत्यावर तो आम्हाला आढळून न आल्याने आम्ही 'नॉट अॅव्हायलेबल' असा शेरा मारल्याचे ते म्हणाले. मात्र त्याच्या नावावरील गुन्ह्यांची माहिती पोलिसांनी का लपवली, या प्रश्नाचे उत्तर त्यांनी दिले नाही. प्रश्न ऐकून त्यांनी फोन कट केला.

ज्यावेळी निलेश घायवळला तत्काळ पासपोर्ट दिला गेला, त्यावेळी सोमनाथ घारगे हे अहिल्यानगरचे पोलीस अधीक्षक नव्हते, हे देखील तितकेच खरे आहे. परंतु तत्कालिन पोलीस अधिकारी आणि कर्मचाऱ्यांनी निलेश घायवळ याच्या नावावरील गुन्हे लपवले, याच्याकडेही डोळेझाक करून चालणार नाही.