अमित शाहांच्या बैठकीआधी पुन्हा संशयाचं धुकं, एकनाथ शिंदेंच्या भूमिकेवर अजित पवारांचं मोठं वक्तव्य

नवी दिल्ली : पंतप्रधान नरेंद्र मोदी आणि केंद्रीय गृहमंत्री अमित शाह यांनी गेली अडीच वर्षे मला खूप उत्तम सहकार्य केले. युतीचे सरकार बनविताना पहाडासारखे तुमच्यामागे उभे राहू, असे त्यांनी सांगितले होते. त्यांनी आम्हाला दिलेला शब्द पाळला. मला राज्यातील गोरगरिब महिला, युवकांसाठी काम करता आले. माझ्या कामावर मी समाधानी आहे. पदासाठी माझा संघर्ष कधीच नव्हता. आता मोदी-शाह पुढचा निर्णय घेतील तो आम्हाला मान्य असेल, अशी भूमिका स्पष्ट करून मुख्यमंत्रिपदावरील दावा एकनाथ शिंदे यांनी सोडला तसेच मुख्यमंत्रिपदाच्या स्पर्धेतून माघार घेत असल्याचे त्यांनी अप्रत्यक्ष सांगितले. मात्र गुरुवारी अजित पवार यांनी एकनाथ शिंदे यांच्या भूमिकेवर बोलताना भाजपच्या मुख्यमंत्रिपदाच्या चेहऱ्याला शिंदे यांचा 'अप्रत्यक्ष' पाठिंबा आहे, असे विधान केल्याने अमित शाहांसोबतच्या बैठकीआधी पुन्हा संशयाचे धुके तयार झाले.