अजितदादांच्या शहराध्यक्षाचा पैसे मोजतानाचा Video बारामतीत व्हायरल, जय पाटलांनी आरोप फेटाळले

बारामती नगर परिषदेची निवडणूक २० जानेवारीला होत आहे. आज १८ तारखेला निवडणूक प्रचार थांबला. नेमका त्याच दिवशी व्हिडीओ व्हायरल झाल्याने तर्कवितर्क लढवले जात आहे. मात्र व्हायरल होत असलेला व्हिडीओ एआयने बनविल्याचा दावा शहराध्यक्ष जय पाटील यांनी केला आहे.

राष्ट्रवादी काँग्रेस पार्टी शरदचंद्र पवार पक्षाचे नेते युगेंद्र पवार यांनी काही दिवसांपूर्वी अजित पवार गटाच्या कार्यकर्त्यांकडून निवडणुकीत पैशाचा प्रचंड वापर होत असल्याचा गंभीर आरोप केला होता. अजित पवारांच्या कार्यकर्त्यांनी तो फेटाळून लावला होता. आता व्हायरल व्हिडीओनंतर अजित पवार यांच्या पक्षावर शरद पवार गटाकडून टीका करण्यात येत आहे.

अपक्ष नगराध्यक्ष पदाचे उमेदवार मोसिन पठाण यांनी आता राष्ट्रवादी काँग्रेस पार्टी अजित पवार पक्षाचे शहराध्यक्ष जय पाटलांचा पैशाच्या बॅगेसह पैसे मोजतानाचा व्हिडिओ व्हायरल केला आहे. त्यानंतर बारामतीत खळबळ उडाली आहे.

संबंधित व्हिडीओ एआयने बनविलेला असून मतदानाच्या आदल्या दिवशी विरोधकांनी खोडसाळपणा केला आहे. या व्हिडीओची तक्रार मी बारामती पोलीस स्टेशनमध्ये केली आहे. मतदानाआधीच विरोधकांच्या पायाखालची वाळू सरकली आहे, असे सांगत आपल्यावरील आरोप जय पाटील यांनी फेटाळून लावले.

शिव-शाहू-फुले-आंबेडकरांच्या विचारधारेनं पुढे जात, बारामती शहरासोबतच ग्रामीण भागाचाही सर्वांगीण विकास करण्याचा आमचा संकल्प आहे. आतापर्यंत बारामतीमध्ये महाराष्ट्रातील सर्वाधिक विकास साधता आला, याचा मला अभिमान आहे. शहरात फिरताना काम केल्याचं समाधान मिळतं, हीच आमच्या कार्याची पोचपावती आहे. बारामती आज विद्येचं माहेरघर म्हणून पुढं येत असून नवनवीन प्रशिक्षण केंद्रे, पायाभूत सुविधा, शिवसृष्टीसारखे प्रकल्प आणि नागरिककेंद्री विकासकामं वेगानं सुरू आहेत, अशा भावना या सभेच्या निमित्ताने अजित पवार यांनी व्यक्त केल्या. तसेच राष्ट्रवादीच्या उमेदवारांमागे उभे राहण्याचे आवाहन त्यांनी बारामतीकरांना केले.