Ajit Pawar Plane Crash: अजित पवारांच्या अपघातग्रस्त विमानाचा ब्लॅक बॉक्स जळाला? दिल्लीतून समोर आली मोठी अपडेट....

२८ जानेवारी रोजी उपमुख्यमंत्री आणि राष्ट्रवादी काँग्रेसचे नेते अजित पवार आणि इतर चार जणांचा विमान अपघातात मृत्यू झाला. या विमानाचा ब्लॅक बॉक्स सापडल्याची पुष्टी अधिकाऱ्यांनी दिली आहे. नागरी उड्डाण मंत्रालयातील (एमओसीए) वरिष्ठ सूत्रांनी सांगितले की, एअर इंडिया अपघाताप्रमाणे, पवारांच्या प्रकरणात सहभागी असलेल्या विमानाचा ब्लॅक बॉक्स सापडला आहे. मात्र, हा ब्लॅक बॉक्स जळालेल्या स्थितीत असल्याची माहिती समोर आली आहे.

सूत्रांनी दिलेल्या माहितीनुसार, या अपघातग्रस्त विमानाच्या ब्लॅक बॉक्सबाबत सरकार पुढील एक-दोन दिवसांत निर्णय घेण्याची अपेक्षा आहे. या ब्लॅक बॉक्सचा डेटा रिकव्हर करण्यासाठी परदेशातून मदत घेतली जाण्याची शक्यता आहे. 'एअर एक्सीडेंट इन्वेस्टिगेशन ब्युरो'ने (AAIB) दिलेल्या माहितीनुसार, आता हे रेकॉर्डर डेटा रिकव्हरीसाठी संबंधित देशाच्या प्रयोगशाळेत पाठवले जाण्याची शक्यता आहे. तिथल्या अत्याधुनिक तंत्रज्ञानाच्या सहाय्याने आगीने होरपळलेल्या डेटाचे विश्लेषण करण्याचा प्रयत्न केला जाणार आहे.

दरम्यान, नागरी विमान वाहतूक महासंचालनालयाने (DGCA) विमानाच्या उड्डाणयोग्यतेची आणि ऑपरेशनल स्थितीची समांतर चौकशी सुरू केली आहे. चौकशी अधिकाऱ्यांनी ऑपरेटिंग कंपनीकडून जप्त केलेल्या मोठ्या प्रमाणात कागदपत्रांची तपासणी केली असल्याने, चौकशीला १० ते १५ दिवस लागण्याची अपेक्षा आहे.