Amravati News: 15 वर्षांच्या मेहनतीवर पाणी, संत्र्याच्या बागा आडव्या, अस्मानी संकटाचा शेतकऱ्यांना फटका!

पावसामुळं झालेल्या नुकसानी बाबत लोकल18 सोबत बोलताना शेतकऱ्यांनी माहिती दिली. चांदूर बाजार तालुक्यातील काजळी येथील शेतकरी मयूर देशमुख यांनी दिलेल्या माहिती नुसार, सर्वाधिक फटका हा कपाशी आणि तूर पिकाला बसलेला आहे. या पिकातून हाती काही लागेल की नाही अशी परिस्थिती आहे. बियाणे, मशागत आणि इतरही अनेक खर्च करून ही पिकं शेतकऱ्यांनी उभी केली होती. मात्र, या पावसाने शेतकऱ्यांच्या संपूर्ण मेहनतीवर पाणी फेरलं आहे. तसेच मोर्शी तालुक्यात देखील काही शेतकऱ्यांचे नुकसान झाले आहे. कपाशी आणि तुरीचे क्षेत्र पूर्णतः वाया जाण्याच्या मार्गावर आहे. आता शासनाकडून नुकसान भरपाईची अपेक्षा आहे, असं शेतकऱ्यांनी सांगितलं.

चांदूर बाजार तालुक्यातील कल्होडी या गावातील चार ते पाच शेतकऱ्यांच्या शेतातील संत्रा पिकाचे नुकसान झाले आहे. तेथील शेतकऱ्यांनी दिलेल्या माहितीनुसार, एका झाडाखाली जवळपास 300 संत्रांची गळ झाली आहे. काही शेतात संत्राची झाडे ही मुळासकट उखडली गेली आहेत. अवघ्या अर्ध्या तासात शेतकऱ्यांचं 50 ते 50 टक्के नुकसान या गावामध्ये झालेलं आहे.