अमरावतीमध्ये संपन्न होतो खापरी उत्सव, नेमकी काय आहे ही परंपरा, कसा साजरा होतो हा सण?

अमरावती - अमरावतीमधील गोराळा गावापासून 2 किलोमीटर आत स्थित असलेल्या पिंगळा देवी संस्थानमध्ये नवरात्र उत्सव अत्यंत उत्साहात पार पडला. नवरात्रीमध्ये या ठिकाणी मोठी यात्रा असते. लाखो लोक इथे दर्शनासाठी येतात. नवरात्रीमध्ये इथे विशेष पूजा केली जाते. त्याला खापरी पूजा म्हणतात.

या नवरात्रीमध्ये सप्तमीसह अष्टमी तिथीला हा उत्सव साजरा करण्यात आला. हा उत्सव कसा साजरा केला जातो? खापरी पूजा नेमकी कशी केली जाते? ते आज आपण जाणून घेऊयात.

पिंगळा देवी संस्थान येथील वंश परंपरागत पुजारी संदिप मारुडकर यांनी लोकल18 सोबत याबाबत माहिती दिली. यावेळी बोलताना त्यांनी सांगितले की, गोराळा येथून 2 किमी अंतरावर पिंगळा देवी गडावर स्थित आहे. विदर्भातील साडे तीन शक्ती पिठापैकी हे अर्ध शक्तीपीठ आहे. या ठिकाणी दरवर्षी नवरात्रीमध्ये विशेष पूजा केली जाते. तिला खापरी पूजा असे म्हणतात. ही पूजा अनेक वर्षापासून सप्तमीसह अष्टमी तिथीला करण्यात येत आहे. या वर्षी ही पूजा अष्टमीला पार पडली. या पूजेचा मान मारुडकर कुटुंबाचा आहे.