अजितदादा १२ डिसेंबरला शरद पवारांना गिफ्ट देणार होते, बोलणंही झालं होतं पण... अंकुश काकडेंनी किस्सा सांगितला

पुणे : अजित पवार यांचे पार्थिव विद्या प्रतिष्ठानच्या मैदानावर आणल्यानंतर लाखोंची गर्दी स्तब्ध झाली. आधीपासून उपस्थित असलेल्या पवार कुटुंबातील सदस्यांना हुंदके अनावर झाले. या सगळ्यात ज्येष्ठ नेते शरद पवार अगदी शांत होते. खिन्न मनाने ते अजित पवार यांच्या पार्थिवाकडे पाहत होते. कामात वाघ असलेल्या पुतण्याला अशा पद्धतीने निरोप द्यावा लागेल, असे कधी त्यांच्या मनातही आले नसेल. काकाच्या कृपेने आमचं बरं चाललंय, असे अजित पवार म्हणायचे. राष्ट्रवादीत फूट पडल्यानंतर अपवाद वगळता अजित पवार यांनी काका शरद पवार यांच्याबद्दल कायम कृतज्ञतेची भावना व्यक्त केली. महापालिका निवडणुकीत दोन्ही राष्ट्रवादीने एकत्र यावे, अशी अजित पवार यांची इच्छा होती. काही अंशी ती इच्छा पूर्णही झाली. पण अजित पवार यांच्या हयातीत दोन्ही राष्ट्रवादी एकत्र आलेल्या ते पाहू शकले नाहीत. याबद्दलचा किस्सा ज्येष्ठ नेते अंकुश काकडे यांनी सांगितला.