लाल किल्ला बॉम्बस्फोटावेळी तोतया IAS ‘कल्पना’ दिल्लीत, योगायोग की कटात सहभाग? धक्कादायक माहिती समोर

रविवारपासून पोलिसांच्या ताब्यात असलेल्या कल्पनाची सध्या सिडको पोलिसांसह गुप्तचर यंत्रणा, एटीएसकडून चौकशी सुरू आहे. बुधवारी तिच्या पोलिस कोठडीत 10 दिवसांची वाढ झाली. पोलिस उपायुक्त प्रशांत स्वामी यांनी गुरुवारी सकाळी 11 ते दुपारी 4 वाजेपर्यंत तसेच एटीएस, गुप्तचर यंत्रणांनी 2 तास चौकशी केली. सायंकाळी पुन्हा सर्वांनी एकत्रित चौकशी करीत तिला बोलते करण्याचा प्रयत्न केला. मात्र, माझ्या खूप ओळखी आहेत, अनेक देशांत माझ्या परिचयाची माणसे, अधिकारी आहेत, असे ती सांगते. तपास यंत्रणांनी तिच्या प्रत्येक उत्तराची खातरजमा करणे सुरू केले आहे. पोलिस निरीक्षक अतुल येरमे, सहायक निरीक्षक योगेश गायकवाड तपास करत आहेत.

कल्पनाच्या दाव्यानुसार, त्याची आणि तिची दिल्लीत वर्षभरापूर्वी ओळख झाली होती. तो उत्तर भारतीय असल्याचे समोर आले आहे. कल्पनाच्या अटकेनंतर पाठ फिरवलेल्या हडकोतील तिचा भाऊ बुधवारी रात्री ठाण्यात हजर झाला. तेव्हा तिच्या आईलादेखील ठाण्यात बोलावण्यात आले होते. पोलिस निरीक्षक अतुल येरमे, सहायक पोलिस निरीक्षक योगेश गायकवाड यांनी दोघांची चौकशी केली. शिवाय, हॉटेल व्यवस्थापकाचाही जबाब नोंदवला.

कल्पनाने एक मोबाइलही नष्ट केल्याचा संशय आहे. तिच्या मोबाइलमध्ये बुधवारी पाकिस्तानच्या अफगाण एम्बॉसिंग, पेशावर कैटॉन्मेंट बोर्ड, झरदारी सर वाइफ, अफगाणिस्तान अॅम्बॅसी, मुजीबभाई, झरदारी सर, मोहम्मद रजा व नक्ची असे 11 क्रमांक आढळले. मात्र, तिच्या मोबाइलमध्ये सौदी अरेबिया, बांगलादेशच्याही अनेकांच्या नावाने क्रमांक असल्याचे गुरुवारी समोर आले. त्याविषयीही कल्पना गोलमाल उत्तर देत आहे.