शिवसेनेच्या ७ उमेदवारांचा चक्क भाजपाला पाठिंबा, बदलापुरात राजकीय चमत्कार, ठाकरे सेनेत दुफळी

राज्यात आणि केंद्रात भाजप आणि शिवसेना उद्धव ठाकरे गटामध्ये विस्तव जात नाही. मात्र असे असताना बदलापूर नगर परिषदेच्या निवडणुकीत उद्धव ठाकरे पक्षाच्या ७ उमेदवारांनी चक्क भाजपाला पाठिंबा जाहीर केलाय. भाजपच्या नगराध्यक्ष पदाच्या उमेदवार रुचिता घोरपडे यांना आपण पाठिंबा देत असल्याचे सेनेच्या उमेदवारांनी जाहीर केले आहे. त्यामुळे बदलापूर नगर परिषदेच्या निवडणुकीत मोठा उलटफेअर झालेला पाहायला मिळतोय.

कविता सकट, मंगेश इंगळे, रुपेश साळवी, प्रफुल्ल कांबळे, सुरेश शिंदे, वैभव सदाफुले, सुभाष शिंदे या शिवसेना ठाकरे गटाच्या उमेदवारांनी भारतीय जनता पक्षाचे नगराध्यक्षपदाच्या उमेदवाराला जाहीर पाठिंबा दिला आहे.

बदलापुरात भारतीय जनता पक्षाकडून रुचिता घोरपडे या नगराध्यक्ष पदाच्या उमेदवार आहेत. शिवसेना ठाकरे गटाच्या सात उमेदवारांनी त्यांना थेट जाहीरपणे पाठिंबा दिल्याने घोरपडे यांना मोठा फायदा होणार असल्याचे सांगितले जात आहे. बदलापुरात झालेल्या राजकीय उलटफेराने सगळेच आश्चर्य व्यक्त करीत आहेत.

ठाकरे सेनेच्या उमेदवारांनी घेतलेल्या भूमिकेनंतर पक्षात वाद उफाळून आला आहे. उद्धव ठाकरे गटाने याबाबत संताप व्यक्त केला असून संबंधित उमेदवारांचा प्रचार आमचे शिवसैनिक करणार नाहीत, शिवाय मतदारांनी देखील या उमेदवारांना मतदान करू नये, असे रोखठोक आवाहन उद्धव ठाकरे गटाचे शहरप्रमुर किशोर पाटील यांनी केले आहे.