"गंमत नाही, हे फार सिरिअसली घ्या..."; रोहित-विराटवरून माजी कॅप्टनचा BCCIला स्फोटक इशारा, चर्चेने खळबळ

इंग्लंडचा माजी क्रिकेटपटू केव्हिन पीटरसन यांनी रोहित शर्मा आणि विराट कोहली टेस्ट क्रिकेटमध्ये पुनरागमन करू शकतात या चर्चेवर प्रतिक्रिया दिली आहे. दक्षिण आफ्रिकेने भारताला घरच्या मैदानावर 0-2 ने नामोहरम केल्यानंतर, बीसीसीआयने या दोन्ही वरिष्ठ खेळाडूंना पुन्हा टेस्ट संघात परतण्याची विनंती केली आहे, अशी अफवा क्रिकेटविश्वात पसरली होती.

विशेष म्हणजे पीटरसनची ही प्रतिक्रिया अशा वेळी आली आहे, जेव्हा आफ्रिकेविरुद्धच्या पहिल्या वनडेत रोहित-विराट जोडीने कमाल केली. या लढतीत रोहितने 60वे अर्धशतक तर विराटने विक्रमी 52वे शतक पूर्ण केले

सोशल मीडियावर रोहित-विराटच्या कसोटीमधील कमबॅकची चर्चा वाढत असताना पीटरसन यांनीही यात उडी घेतली आणि आपलं मत मांडलं. त्यांनी म्हटलं की, बीसीसीआयने हा पर्याय गंभीरपणे विचारात घ्यायला हवा, गंमत म्हणून नव्हे. पीटरसन यांच्या मते, रोहित आणि कोहलीशिवाय टेस्ट क्रिकेटचा अस्तित्वच धोक्यात येऊ शकतो.

मिडिया किंवा सोशल मीडियावर जे काही लिहिलं जातं त्यावर मी नेहमी विश्वास ठेवत नाही. पण जर या बातमीमध्ये अर्धंसुद्धा सत्य असेल की विराट आणि रोहित पुन्हा टेस्ट क्रिकेट खेळण्याचा विचार करत आहेत, तर याला अतिशय गंभीरतेने घ्यायला हवं. टेस्ट क्रिकेटचे अस्तित्व वाचवायचे असेल तर जगातील सर्वात मोठे स्टार्स हे फॉर्मॅट खेळण्यास हवे.

दुसरीकडे बीसीसीआयचे सचिव देवजीत सैकिया यांनी अशा कोणत्याही चर्चेला थेट नकार दिला. त्यांनी स्पष्ट केले की, अशा प्रकारची कोणतीही बैठक किंवा चर्चा रोहित किंवा विराटसोबत झालीच नाही.

एका हिंदी वृत्तवाहिनीशी बोलताना सैकिया म्हणाले, विराट कोहलीबद्दल जे काही सांगितलं जातंय ते पूर्णपणे अफवा आहे. या विषयावर आमची त्याच्यासोबत कोणतीही चर्चा झालेली नाही. कृपया अफवांना महत्त्व देऊ नका.

रोहित शर्मा आणि विराट कोहली यांनी यंदा मे महिन्यात, इंग्लंड दौऱ्यापूर्वीच टेस्ट क्रिकेटमधून माघार घेतली होती. शेवटची वेळ ते ऑस्ट्रेलियाविरुद्धची मालिका खेळताना दिसले होते, जी भारत 1-3 ने गमावली होती.

भारतीय क्रिकेट संघाच्या अलीकडील टेस्ट पराभवांनी चाहत्यांमध्ये चर्चा रंगू लागली आहे की, या दोन्ही दिग्गजांनी पुन्हा टेस्टमध्ये परतलं पाहिजे का? भारताने 1984-85 नंतर पहिल्यांदाच सलग दोन टेस्ट मालिका गमावल्या. ज्यात न्यूझीलंडकडून 0-3 आणि नुकतंच दक्षिण आफ्रिकेकडून 0-2च्या पराभवाचा समावेश आहे.

घरच्या मैदानावर भारताची पकड सैल होत असल्याने अनेक चाहत्यांनी मुख्य प्रशिक्षक गौतम गंभीर यांच्यावर टीका केली आहे. त्यांच्यावर दोन्ही ज्येष्ठ खेळाडूंना खूप लवकर बाजूला केल्याचा आरोप करण्यात येत आहे. दरम्यान पहिल्या वनडेमध्ये रोहित आणि कोहली यांनी चांगली कामगिरी करत आपली फॉर्म परत दाखवली आहे, ज्यामुळे टेस्ट पुनरागमनाच्या चर्चा आणखी जोर धरू लागल्या आहेत.