एकेकाळी ट्रॅक्टरवर केले काम, आज दिवसाला 60 हजार रुपयांची कमाई, बीडमधील तरुणाची भन्नाट कहाणी 

बीड - हॉटेल व्यवसाय हा अनेकांसाठी कमाईचा प्रमुख स्त्रोत ठरलेला आहे. जेवणाची क्वालिटी उत्तम असल्यावर ग्राहकांचा देखील अगदी चांगला प्रतिसाद मिळतो. या व्यवसायाच्या माध्यमातून आज अनेक जण यशस्वी झाले आहेत. आज अशाच एका हॉटेल व्यवसायिकाची कहाणी आपण जाणुन घेणार आहोत.

अतिक शेख असे या हॉटेल व्यावसायिकाचे नाव आहे. ते बीड येथील रहिवासी आहेत. अतिक शेख यांची व्यावसायिक भरारी खूप कौतुकास्पद आहे. आज ते दिवसाला हजारो तर महिन्याला लाखो रुपयांची कमाई आपल्या हॉटेल व्यवसायातून करत आहेत.

अगदी गावरान पद्धतीने इथे ग्राहकांना जेवण मिळते. ग्राहक देखील अगदी दूरवरून खास करून इथल्या जेवणाची चव चाखण्यासाठी येतात. ग्राहक इथल्या जेवणाला विशेष पसंती देतात. अतिक शेख हे आधी हाताला मिळेल ते काम करायचे. मग त्यानंतर त्यांनी ट्रॅक्टरवर काम चालू केलं. परंतु तिथूनही पुरेसे पैसे मिळत नव्हते. मग त्यांच्या मनामध्ये विचार आला आणि त्यांनी स्वतःला हॉटेल व्यवसायाकडे वळण्याचे ठरवले.

त्यांनी हॉटेल व्यवसायाला सुरुवात केली. त्यावेळी सुरुवात अगदी छोटीशी होती. परंतु आज जर पाहिलं तर त्यांचा हॉटेल व्यवसाय हा अगदी वेगळ्या उंचीवर येऊन पोहोचलेला आहे. अतिक शेख हे आज  नवउद्योजकांसाठी प्रेरणादायी ठरले आहेत. आधी शून्यातून वर येऊन त्यांनी हॉटेल व्यवसायामध्ये आपला जम बसवला.

सुरुवातीला या व्यवसायामध्ये त्यांना काही आर्थिक अडचणींना देखील तोंड द्यावे लागले. यानंतर ग्राहकांचा भरभरून प्रतिसाद मिळाला आणि त्यांनी या व्यवसायामध्ये सातत्य टिकवून ठेवले.

इथल्या रस्याची चव तर अगदी तोंडाला पाणी सुटेल अशी आहे. थेट दूरवरून अतिक शेख यांच्या हॉटेलवर जेवणासाठी आल्यानंतर ग्राहक आपला अनुभव आवर्जून इतरांना सांगतात. अतिक शेख यांच्या कमाई बाबत जाणुन घेतले असता आज ते दिवसाला 50 ते 60 हजार एवढी कमाई करतात. त्यांचा हा प्रवास निश्चितच प्रेरणादायी आहे.