एबी फॉर्मवरुन राडा, पक्षांतर्गत वाद, पण संकटमोचकांच्या या रणनितीने गेम फिरवला, ५ कारणांमुळे नाशकात भाजप ठरला किंगमेकर!

नाशिक : महापालिका निवडणुकीत स्वबळावर सत्ता मिळवण्याचे लक्ष्य ठेवून उतरलेल्या भाजपसाठी ही लढत अनेक अंतर्गत संघर्ष, नाराजी आणि संघटनात्मक आव्हानांनी भरलेली ठरली. उमेदवारी अर्ज दाखल करण्यापासून ते माघारीच्या अखेरच्या दिवसापर्यंत इच्छुकांमध्ये प्रचंड चढाओढ सुरू होती. तिकीट मिळाल्यानंतरही पक्षातील गटबाजी, एबी फॉर्मच्या वितरणावरून निर्माण झालेला गोंधळ आणि पक्षप्रवेशांवरून उसळलेले नाराजीचे नाट्य यामुळे भाजपची प्रतिमा काही काळासाठी मलिन झाली होती. मात्र निवडणुकीच्या अखेरच्या टप्प्यात मंत्री गिरीश महाजन यांनी थेट सूत्रे हातात घेत संपूर्ण प्रचार यंत्रणेला दिशा दिली आणि त्यातूनच भाजप पुन्हा सत्तेपर्यंत पोहोचू शकला.