Buldhana Lok Sabha Result : बुलढाण्यात कोण मारणार बाजी? प्रतापराव जाधव की खेडेकर?

यावेळी महायुतीकडून पुन्हा एकदा शिवसेनेचे विद्यमान खासदार प्रतापराव जाधव यांना संधी देण्यात आली. तर महाविकास आघाडीकडून शिवसेना ठाकरे गटाचे जिल्हाप्रमुख नरेंद्र खेडेकर यांना निवडणुकीच्या रिंगणात उतरवण्यात आलं. त्यामुळे या ठिकाणी सामाना शिवसेना विरूद्ध शिवसेना ठाकरे गट असा रंगला. शिवसेनेचे जुने सहकारी आमने-सामने असल्याचं पाहायला मिळालं. मात्र दुसरीकडे अपक्ष उमेदवार रविकांत तुपकर आणि संदीप शेळके यांनी देखील प्रचारात चांगलीच रंगत आणली.

दरम्यान वंचित बहुजन आघाडीकडून ओबीसी चेहरा म्हणून वसंतराव मगर यांना या लोकसभा निवडणुकीत उतरवण्यात आलं होतं. बुलढाणा जिल्ह्यातील लोकसभा निवडणुकीतील उमेदवारांच्या सामाजिक परिस्थितीवर नजर टाकली असता प्रमुख चारही उमेदवार हे मराठा समाजाचे असल्याने त्यात काही अंशी मताचे विभाजन होण्याची शक्यता वर्तवली जात होती. त्यामुळे वंचित बहुजन आघाडीकडून देण्यात आलेल्या ओबीसी उमेदवाराला या मतं विभागणीचा फायदा करून घेता आला असता, मात्र वंचित बहुजन आघाडीला त्यात यश आलं नाही.

यंदाच्या या निवडणुकीत बुलढाणा लोकसभेसाठी तब्बल 21 उमेदवार रिंगणात होते. मात्र, महायुतीचे खासदार प्रतापराव जाधव, महाविकास आघाडीकडून नरेंद्र खेडेकर, वंचित बहुजन आघाडीचे वसंत मगर, तर अपक्ष म्हणून शेतकरी नेते रवीकांत तुपकर आणि बुलढाणा वन मिशनचे संदीप शेळके यांच्यामध्ये प्रमुख लढत झाली.