बिस्किटामध्ये विष कालवलं अन् एकाच वेळी 10 श्वानांचा मृत्यू, छत्रपती संभाजीनगरमधील धक्कादायक घटना

पहाडसिंगपुऱ्यातील गुरु दत्तानगर येथील रहिवासी उषा राजू घाटे यांनी दिलेल्या फिर्यादीनुसार, लॅब्रॉडॉग जातीचा इंग्लिश श्वान गेली सहा वर्षापासून पाळलेला होता. दरम्यान गुरुवार दिनांक 30 रोजी सकाळी सात वाजेच्या सुमारास घाटे कुटुंबीय मॉर्निंग वॉकसाठी निघाले. यावेळी बुजू नावाचा इंग्लिश श्वान घराच्या कंपाऊंडच्या बाहेर सोडला. यावेळी त्याने काही पदार्थ खाल्ले. थोड्यावेळाने घाटे कुटुंबाने श्वानाला घरात घेऊन ते कामानिमित्त बाहेर गेले.

थोड्या वेळात श्वानाला उलट्या झाल्या. काही वेळाने ओळखीच्या व्यक्तीने दिलेल्या माहितीनुसार घरासमोरील झाडांमध्ये विषारी औषध लावून बिस्किट टाकलेले होते. कदाचित ते खाल्ल्याने उलट्या झाल्या असतील असे सांगितले. त्यानंतर श्वानाला तातडीने खडकेश्वर येथील जनावरांच्या दवाखान्यात दाखल करण्यात आले. यावेळी डॉक्टरांनी तपासून मृत घोषित केले. याप्रकरणी अज्ञात व्यक्तीविरुद्ध पोलीस ठाण्यात गुन्हा दाखल करण्यात आला आहे.

त्यासोबतच इतरही 9 भटके श्वान आहेत. त्यांचा देखील हे बिस्किट खाऊन मृत्यू झाल्याचे लक्षात आले. याप्रकरणी घाटे यांच्या तक्रारीवरून अज्ञात व्यक्ती विरुद्ध गुन्हा दाखल करण्यात आलेला आहे.