आईची काय चूक? लेकीचा फोन आला म्हणून आणायला गेली, ‘त्याने’ बस थांबवली अन् भयंकर प्रकार

‎या प्रकरणात आर्यन राजू साबळे (रा. धावडा, ता. जि. बुलढाणा) असे आरोपीचे नाव असून त्याच्याविरोधात पुंडलिकनगर पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, पीडित मुलगी ही 17 वर्षे 16 दिवसांची असून तिच्या आईने याबाबत तक्रार दाखल केली आहे. तक्रारीत नमूद केल्याप्रमाणे, 11 डिसेंबर 2025 रोजी सायंकाळच्या सुमारास ही मुलगी कोणालाही न सांगता घरातून बाहेर पडली होती. त्यानंतर कुटुंबीयांनी तिचा मित्र-मैत्रिणी, नातेवाईक तसेच परिसरात शोध घेतला; मात्र ती सापडली नव्हती.

‎सुमारे तीन महिन्यांनंतर, 10 मार्च 2026 रोजी सकाळी मुलीने आईला फोन करून ती बुलढाणा जिल्ह्यातील धावडा येथे असल्याची माहिती दिली. तसेच ती आर्यन राजू साबळे याच्यासोबत असल्याचेही तिने सांगितले. मुलीकडून फोन आल्यानंतर आई तातडीने धावडा येथे गेली. तेथे चौकशी केल्यानंतर मुलगी आर्यन साबळे यांच्या घरी असल्याचे समोर आले. त्यानंतर दुसऱ्या दिवशी आईने मुलीला सोबत घेऊन बसने छत्रपती संभाजीनगरकडे परतण्याचा निर्णय घेतला.

बस धावडा फाटा येथे पोहोचताच आर्यन साबळे याने बससमोर उभे राहून बस थांबवली. त्यानंतर त्याने आई व मुलीला बसमधून खाली उतरवले आणि मुलीला जबरदस्तीने पुन्हा आपल्या घरी नेले. काही वेळातच तो त्या मुलीला घेऊन तेथूनही पळून गेला. या प्रकारानंतर घाबरलेल्या आईने तात्काळ 112 या आपत्कालीन क्रमांकावर फोन करून पोलिसांना घटनेची माहिती दिली.

दरम्यान, महिलेने पुंडलिकनगर पोलिस ठाण्यात तक्रार दिली. तिच्या तक्रारीच्या आधारे आर्यन राजू साबळे याच्याविरोधात अपहरणाचा गुन्हा दाखल करण्यात आला आहे. पोलिस पुढील तपास करत असून अल्पवयीन मुलीचा शोध सुरू आहे.