मराठवाड्याला मोठं गिफ्ट, छ.संभाजीनगर-परभणी रेल्वे मार्गाच्या दुहेरीकरणाला मंजुरी

छत्रपती संभाजीनगर ते परभणी रेल्वेमार्गाच्या दुहेरीकरणाच्या प्रस्तावाला गुरुवारी (31 जुलै) केंद्रीय मंत्रिमंडळाने मंजुरी दिली. त्यानंतर केंद्रीय रेल्वेमंत्री अश्विनी वैष्णव यांनी ट्विटच्या माध्यमातून छत्रपती संभाजीनगर-परभणी रेल्वेमार्गाच्या दुहेरीकरणाबाबतच्या निर्णयाची माहिती दिली. या मार्गामुळे रेल्वे प्रवास आणि माल वाहतूक अधिक गतिमान होणार आहे.

हा रेल्वेमार्ग 177 किलोमीटर लांबीचा आहे. यासाठी 2179 कोटी रुपयांचा निधी अपेक्षित आहे. आगामी अर्थसंकल्पात या निधीला मंजुरी मिळण्याची शक्यता आहे. या रेल्वेमार्गावर 21 स्टेशन, 29 भुयारी मार्ग, 28 मोठे पूल, 161 छोटे पूल आहेत. या मार्गामुळे दिनेगाव (जालना), दौलताबाद येथील मालधक्क्याला थेट कनेक्टिव्हिटी मिळणार आहे. शिवाय, जालना येथील ड्रायपोर्ट आणि छत्रपती संभाजीनगरमधील 'डीएमआयसी' प्रकल्पाला याचा मोठा फायदा होणार आहे. मराठवाड्यातील औद्योगिक विकासासाठी हे अत्यंत महत्त्वाचे पाऊल मानले जात आहे. 2028-29 पर्यंत हा रेल्वे मार्ग पूर्ण होण्याची अपेक्षा आहे.

रेल्वेने असा दावा केला आहे की, या मार्गामुळे 4.3 दशलक्ष टन अतिरिक्त मालवाहतूक करता येईल शिवाय वाहतूक खर्चात वार्षिक 1,714 कोटी रुपयांची बचत होईल. या नवीन मार्गामुळे 4.5 कोटी लिटर डिझेलची बचत होऊन कार्बन डायऑक्साइड उत्सर्जन 77 कोटी किलोने घटण्याची अपेक्षा आहे.