महाराष्ट्रातील अत्यंत प्राचीन शिव मंदिरात ब्रह्मा, विष्णू, महेश यांच्या मूर्ती; बांधकाम पाहूनच व्हाल अवाक्, VIDEO

धाराशिव : आजपासून श्रावण महिना सुरू झाला आहे. आज श्रावण महिन्यातील पहिला सोमवार आहे. श्रावण महिन्यातील सोमवारचे विशेष महत्त्व आहे. या दिवशी भगवान शंकराची आराधना केली जाते. त्यामुळे या महिन्यातील श्रावण सोमवारच्या पुजेचे विशेष पुण्य लाभते, असे सांगितले जाते. श्रावण महिन्याच्या निमित्ताने शंकराच्या मंदिरातही मोठी गर्दी पाहायला मिळत आहे. आज आपण अशाच एका अत्यंत प्राचीन मंदिराविषयी जाणून घेणार आहोत.

धाराशिव जिल्ह्यातील उमरगा शहरात प्राचीन शिवमंदिर आहे. धाराशिवपासून 100 किलोमीटर तर चालुक्यांची राजधानी बसवकल्याणपासून 45 किलोमीटर अंतरावर हे मंदिर आहे. हे शिवमंदिर चालुक्य काळातील असून याचा आकार तारकाकृती आहे.

मंदिरात कीर्ती मुखाच्या कलाकृती, शिवनृत्य, सप्तमातृका, अष्टदिक्पाल आणि शोभायमान छत ही येथील वैशिष्टये ठरतात. येथील गर्भगृहात भितीला लागून पिठावर विष्णूची चतुर्भुज मूर्ती आहे आणि खाली शिवपिंड आहे. डावीकडील गर्भगृहात शिवपिंड आहे. उजवीकडील गर्भगृहात ब्रह्मा आहेत. या दोन्ही गर्भगृहाच्या दरवाजावरील शिल्पे वैष्णव आहेत तर मध्यवर्ती गर्भगृहाच्या द्वारावरील शिल्पे शैव आहेत.

मंदिरात दर्शनासाठी दररोज भाविकांची गर्दी असते. आज श्रावण सोमवार निमित्त मंदिरात दर्शनासाठी भाविकांची मोठी गर्दी पहायला मिळाली.