Eknath Shinde: खासदारांची लॉबिंग अन् एकनाथ शिंदेंचा संताप! दिल्लीतील शिंदे गटाच्या बैठकीत 'त्या' रात्री नेमकं काय घडलं?

मंगळवारी दुपारी संसदेच्या आवारात पंतप्रधान मोदी आणि उपमुख्यमंत्री शिंदे यांच्यात सकारात्मक बैठक पार पडली. "राज्याच्या महत्त्वाच्या प्रश्नांवर पंतप्रधानांशी सविस्तर चर्चा झाली आहे," असे शिंदे यांनी पत्रकारांशी बोलताना सांगितले. या भेटीत आगामी स्थानिक स्वराज्य संस्थांच्या निवडणुका आणि राज्यातील सध्याची राजकीय स्थिती यावरही विचारविनिमय झाल्याची शक्यता वर्तवण्यात येत आहे. "दिल्लीत आल्यावर माझ्यावर कोणी कितीही टीका केली, तरी राज्याच्या हितासाठी मला जे हवे आहे, ते मी करतच राहणार," असा टोलाही त्यांनी विरोधकांना लगावला.

दिल्लीत पोहोचल्यानंतर सोमवारी रात्री उपमुख्यमंत्री शिंदे यांनी आपल्या खासदारांसोबत एक महत्त्वाची बैठक घेतली. सूत्रांनी दिलेल्या माहितीनुसार, या बैठकीत मुख्यमंत्र्यांनी काही खासदारांच्या कामगिरीबद्दल तीव्र नाराजी व्यक्त केली. केंद्रातील आगामी मंत्रिमंडळ फेरबदलात स्थान मिळवण्यासाठी काही खासदारांची धडपड सुरू असल्याची चर्चा होती. यावर भाष्य करताना शिंदेंनी संबंधित खासदारांना स्पष्ट शब्दांत चपराक लगावली. "आधी जमिनीवर काम करून दाखवा, मगच पदाची अपेक्षा ठेवा," अशा शब्दांत त्यांनी खासदारांना ठणकावले. पक्षविस्तार आणि लोकहिताच्या कामांकडे दुर्लक्ष करून केवळ पदासाठी लॉबिंग करणाऱ्यांना एकनाथ शिंदे यांनी खडे बोल सुनावले आहेत.

शिवसेना पक्ष आणि निवडणूक चिन्हासंदर्भातील खटला सध्या सर्वोच्च न्यायालयात अंतिम टप्प्यात आहे. या सुनावणीच्या पार्श्वभूमीवर कायदेशीर सल्ल्यासाठीही ही दिल्लीवारी महत्त्वाची मानली जात आहे. विशेष म्हणजे, या दौऱ्यात मुख्यमंत्र्यांची केंद्रीय गृहमंत्री अमित शहा यांच्याशी भेट झाली नाही, ज्यामुळे या दौऱ्याचा मुख्य उद्देश पक्षीय शिस्त आणि थेट पंतप्रधान स्तरावरील समन्वय असल्याचे दिसून येते.