श्रीकांत शिंदे उपमुख्यमंत्री होणार? एकनाथ शिंदे यांच्याकडून स्पष्ट संकेत, म्हणाले महाराष्ट्र हितासाठी...

सातारा (दरे गाव) : सत्तावाटपाची दिल्लीतील बैठक आटपून काळजीवाहू मुख्यमंत्री एकनाथ शिंदे तडक साताऱ्याच्या मूळ गावी आरामासाठी गेल्याने राज्याच्या राजकारणात उलट सुलट चर्चांना सुरुवात झाली. भाजपला मिळालेल्या घवघवीत यशानंतर मुख्यमंत्रिपद मित्रपक्षांना न देण्याची स्पष्ट भूमिका पक्षनेतृत्वाने शिंदे यांना कळविल्याने ते नाराज असल्याचे बोलले जाते. याच नाराजीतून दिल्लीची बैठक आटपून ते साताऱ्याला विश्रांती घेण्यासाठी गेले. दोन दिवस दरे गावी मुक्काम ठोकल्यानंतर त्यांनी रविवारी माध्यमांनी संवाद साधला.