Eknath Shinde : महायुतीत नव्या भिडूची एन्ट्री! महापालिका निवडणुकीपूर्वी एकनाथ शिंदेंनी डाव टाकला

आगामी स्थानिक स्वराज्य संस्थांच्या निवडणुकीसाठी काही महिन्यांचा कालावधी उरला आहे. राज्यातील सगळेच पक्ष महापालिका निवडणुकीसाठी आपल्या ताकदीची चाचपणी करत आहे. एकनाथ शिंदे यांच्याकडून मुंबई आणि इतर भागात मनसेसोबत युती करण्याचे प्रयत्न सुरू आहे. पडद्यामागे चर्चा सुरू असल्याचे म्हटले जाते. तर, दुसरीकडे एकनाथ शिंदे यांच्याकडून मतांच्या बेगमीसाठी इतर लहान पक्षांसोबत चर्चा सुरू आहे. आता एकनाथ शिंदे यांनी आपल्यासोबत आणखी एका पक्षाला सोबत घेतले आहे.

राज्यातील महायुतीमध्ये आता आणखी एका नव्या पक्षाची एन्ट्री होणार आहे. एकनाथ शिंदेय यांच्या नेतृत्वाखालील शिवसेना आणि आनंदराज आंबेडकर यांच्या नेतृत्वाखालील रिपब्लिकन सेनेत युती होणार असल्याची माहिती समोर आली आहे. आज दुपारी या युतीची औपचारिक घोषणा करण्यात येणार असून, त्यामुळे स्थानिक स्वराज्य संस्थांच्या निवडणुकांमध्ये नव्या समीकरणांची सुरुवात होणार आहे.

ही युती "शिवशक्ती-भीमशक्ती" या ऐतिहासिक संकल्पनेला नव्या रूपात पुढे नेणारी ठरणार आहे. शिवसेनाप्रमुख दिवंगत बाळासाहेब ठाकरे यांच्या काळात नामदेव ढसाळ आणि अर्जुन डांगळे यांच्या सोबत ही संकल्पना प्रथम राबवण्यात आली होती. त्यानंतर उद्धव ठाकरे यांनी प्रकाश आंबेडकर यांच्या वंचित बहुजन आघाडीसोबत युती करण्याचा प्रयत्न केला, मात्र ती युती यशस्वी ठरली नव्हती.

आता एकनाथ शिंदे यांनी खुद्द डॉ. बाबासाहेब आंबेडकर यांचे नातू आनंदराज आंबेडकर यांच्यासोबत राजकीय सहकार्याचा नवीन अध्याय सुरू करत "शिवशक्ती-भीमशक्ती"च्या प्रयोगाला नवसंजीवनी दिली आहे. ही युती निवडणुकांपूर्वी दलित-मराठा मतदारांमध्ये ठसा उमटवू शकते, असा राजकीय विश्लेषकांचा अंदाज आहे.

युतीच्या औपचारिक घोषणेनंतर, दोन्ही पक्ष एकत्रित प्रचार रणनीती, उमेदवार निवड आणि जागावाटपाचा प्रारंभ करतील, अशी शक्यता वर्तवली जात आहे. आनंदराज आंबेडकर यांना शिंदे गटाच्या कोट्यातली जागा मिळणार की महायुतीत स्वतंत्रपणे जागा मिळणार, याकडे आता लक्ष लागले आहे.