Beed: 'आजाराने छळलं होते, मरणाने केली सुटका'; सोन्यासारख्या पिकात विश्वानाथ यांना पाहून गाव हळहळलं

मिळालेल्या माहितीनुसार,  बीडच्या अंबाजोगाई तालुक्यातील ममदापूर शिवारात ही घटना घडली आहे. उसाच्या फडात लागलेल्या आगीमध्ये एका 60 वर्षीय वयोवृद्धचा जळालेल्या अवस्थेत मृतदेह आढळल्याने परिसरात खळबळ उडाली आहे. विश्वनाथ पांचाळ असं मृत व्यक्तीचं नाव आहे. पहाटे साडेपाचच्या सुमारास उसाच्या शेताला आग लागल्याची माहिती समोर आली आहे.

शेतात आग लागल्याची माहिती मिळताच लोकांनी शेताकडे धाव घेतली. आग विझवण्याचे प्रयत्न सुरू असताना सरीमध्ये  विश्वनाथ पांचाळ यांचा जळालेला मृतदेह आढळून आला. प्राथमिक माहितीनुसार, विश्वनाथ पांचाळ हे गेल्या काही वर्षांपासून आजाराने ग्रस्त होते. आजारावर त्यांच्यावर उपचार सुरू होते. पण, कोणताही फरक जाणवला नव्हता. त्यामुळे आजाराला कंटाळून त्यांनी आत्महत्या केल्याचा संशय पोलिसांनी व्यक्त केला आहे. घटनेची माहिती मिळताच अंबाजोगाई ग्रामीण पोलिसांनी घटनास्थळी धाव घेत पंचनामा केला असून मृतदेह शवविच्छेदनासाठी पाठवण्यात आला आहे. या घटनेमुळे शिवारात खळबळ उडाली आहे.