Indian Overseas Bank Bharti : इंडियन ओव्हरसीज बँकेमध्ये नोकरीची सुवर्णसंधी, 60 हजार ते 90 हजारापर्यंत मिळणार पगार

इंडियन ओव्हरसीज बँकेने (IOB) स्पेशलिस्ट ऑफिसरच्या (SO) रिक्त पदांसाठी भरती जाहीर केली आहे. या भरतीच्या माध्यमातून 127 पदांची भरती केली जाणार आहे. भरतीसाठी उमेदवारांना iob.in या अधिकृत वेबसाइटवर जाऊन अर्ज करायचा आहे. भरतीच्या माध्यमातून स्पेशलिस्ट ऑफिसरच्या अखत्यारित अनेक रिक्त पदे आहेत, त्यांची भरती केली जाणार आहे. जाहिरातीनुसाप प्रत्येक पदासाठी वेगवेगळी शैक्षणिक पात्रता निश्चित करण्यात आली आहे. या पदांसाठी अर्जदाराकडे कोणत्याही शाखेची पदवी असणं गरजेचं आहे. उमेदवारांना अर्ज करण्यापूर्वी बँकेने जारी केलेलं भरतीची जाहिरात काळजीपूर्वक वाचावी, जेणेकरून त्यामध्ये नमुद करण्यात आलेली शैक्षणिक पात्रता आणि अटींबद्दलची संपूर्ण माहिती तुम्हाला मिळू शकेल.

महाराष्ट्र, तामिळनाडू, ओडिशा, गुजरात, पश्चिम बंगाल आणि पंजाब हे नोकरीचे ठिकाण आहेत. भरती प्रक्रियेत, प्रवर्गानुसार अर्ज शुल्क देखील निश्चित करण्यात आले आहे. बँकेने प्रसिद्ध केलेल्या जाहिरातीमध्ये वयाची अट सुद्धा देण्यात आली आहे. जास्तीत जास्त 30 वर्षे असून कमीत कमी 20 वर्षे इतकी वयोमर्यादा आहे. SC आणि ST वर्गासाठी 5 वर्षांची सूट आहे, तर OBC वर्गासाठी 3 वर्षांची सूट आहे. खुला प्रवर्ग, इतर मागासवर्गीय आणि आर्थिकदृष्ट्या दुर्बल घटक या प्रवर्गातील उमेदवारांसाठी अर्ज शुल्क 1,000 रुपये (जीएसटीसह) ठेवण्यात आलं आहे. तसेच, अनुसूचित जाती, अनुसूचित जमाती आणि अपंग व्यक्ती असलेल्या उमेदवारांसाठी केवळ 175 रुपये रुपये अर्जाचं शुल्क असणार आहे.