जालन्यात पोलिसाला सापडली लाल रंगाची बॅग, लगेच केला फोन, पुढे जे घडलं ते...

जालना: पैशाच्या हव्यासापोटी हल्ली काहीजण गैरमार्ग अवलंबताना दिसतात. प्रसंगी खंडणी, अपहरण यासारख्या घटना देखील घडतात. मात्र जालना जिल्ह्यातील एका पोलीस कर्मचाऱ्यांने दाखवलेला प्रामाणिकपणा चर्चेचा विषय ठरलाय. तब्बल एक लाख रुपयांचा ऐवज असलेली बॅग उदय शिरसाठ या पोलीस कर्मचाऱ्याने संबंधिताला परत केली. जालना पोलीस अधीक्षक अजयकुमार बंसल यांच्या हस्ते हा ऐवज संबंधित महिलेला परत देण्यात आला. शिरसाठ यांनी दाखवलेल्या प्रामाणिकपणाचं सर्वत्र कौतुक होत असून पोलीस अधीक्षकांनी देखील गौरवोद्गार काढले आहेत.

जालन्यातील पोलीस कर्मचारी उदय शिरसाठ कामाच्या ठिकाणी पोहोचत असताना मंठा चौफुली परिसरात पडलेली लाल रंगाची बॅग आढळली. ही बॅग उघडून पाहिली असता त्यामध्ये एक पर्स होती आणि त्या पर्समध्ये एक सोन्याची पोत, मोबाईल फोन आणि काही रोख रक्कम आढळली. सापडलेल्या मोबाईल फोन वरूनच त्यांनी कॉन्टॅक्ट काढून संबंधित महिला संपदा पडघन यांना कॉल केला आणि बॅग सापडल्याची माहिती दिली. संबंधित बॅग त्यांचीच असल्याची खात्री पटल्यानंतर एक लाख रुपयांचा ऐवज असलेली ही बॅग जालना जिल्ह्याचे पोलीस अधीक्षक अजय कुमार बंसल यांच्या हस्ते संपदा पडघन यांना देण्यात आली.