Health Tips : रोज थोडा आल्याचा रस प्या अन् हृदयरोगासह अनेक आजारांना ठेवा दूर, भन्नाट आहेत फायदे

कोल्हापूर : आपल्या जेवणात इतर मसाल्याच्या घटकांबरोबरच आल्याचा वापर देखील सर्रास केला जात असतो. याच आल्याचा रस आपल्या शरीरासाठी अत्यंत गुणकारी ठरत असतो. आले हे अनेक पोषकतत्वांनी युक्त असून रोज आल्याचा वापर केल्यास आपले शरीर निरोगी राहण्यास मदत होते. मुख्यतः हृदय रोगाशी संबंधित, पोट विकार, रक्ताभिसरण, चयापचय आणि त्वचेची गुणवत्ता सुधारण्यासाठी आल्याचा किंवा आल्याच्या रसाचा फायदा होतो. त्यामुळेच नेमक्या कोणकोणत्या समस्यांवर आले उपयोगी ठरू शकते, आल्याचा रस रोज पिल्याने नेमके काय काय फायदे होऊ शकतात, याबाबत कोल्हापुरातील आयुर्वेद तज्ञ डॉ. अनिलकुमार वैद्य यांनी महत्त्वाची माहिती दिली.

आल्यामध्ये कॅल्शियम, मॅग्नेशियम, पोटॅशियम, सोडियम आणि ए, बी1, बी2, सी अशी जीवनसत्त्वे असतात. तर आले हे अँटी ऑक्सिडेंट, अँटी इंफ्लेमेटरी आणि अँट कॅन्सर गुणधर्मांनी युक्त असते. आल्यामध्ये जास्त प्रमाणामध्ये कार्बोहायड्रेट्स आणि फायबर्स असतात. म्हणूनच दररोज आल्याचा समावेश आपल्या जेवणात करणे योग्य ठरते, असे मत डॉ. अनिलकुमार वैद्य यांनी व्यक्त केले. आल्याचा सेवनाचा काय फायदा होतो, याबाबतही त्यांनी माहिती दिली.