Crime News : नमस्कार घालणे सख्ख्या भावांच्या जीवावर, लातूरमध्ये दोघांना भोसकलं, एकाचा मृत्यू

नमस्कार का घातला? या किरकोळ कारणावरुन झालेल्या हाणामारीत एकाचा गुप्तीने भोसकून खून करण्यात आला आहे तर एकजण गंभीर जखमी झाल्याची धक्कादायक घटना औसा तालुक्यातील होळी गावात काल रात्री उशीरा घडली आहे. होळी या गावातील महादेव केरबा यादव आणि त्यांचा लहान भाऊ संभाजी केरबा यादव सकाळी घरासमोर बसले होते. गावातील काही तरुणांनी त्यांना नमस्कार घातला होता. यावरून वाद वाढला आणि तो वाद विकोपाला गेला. सकाळी शाब्दिक बाचाबाचीही झाली होती. यादव बंधूचे प्रकाश जाधव यांच्या बरोबर अनेक दिवसांपासून वाद होते. त्यातच सकाळी नमस्कार का घातला यावरूनही वाद उफाळून आला होता. रात्री यादव बंधू यांनी सकाळच्या घटनेचा जाब विचारण्यासाठी प्रकाश जाधव यांच्या घराकडे गेले. त्यावेळी प्रकाश व्यंकट जाधव, सतीश व्यंकट जाधव या दोन भावांनी त्यांच्यावर तीक्ष्ण हत्यारांनी वार सुरू केले.