Local Body Election 2025 : पालघरच्या राजकारणात मोठा भूकंप, शिंदे गटाने डाव टाकला, मित्रपक्षाची डोकेदुखी वाढणार

डहाणू नगरपरिषदेचे माजी उपनगराध्यक्ष असलेल्या राजू माच्छी यांनी आपल्यासोबत तब्बल सहा माजी नगरसेवकांसह शेकडो कार्यकर्त्यांना घेऊन उपमुख्यमंत्री एकनाथ शिंदे यांच्या प्रमुख उपस्थितीत शिवसेनेत प्रवेश केला. स्थानिक राजकारणावर मजबूत पकड असलेल्या या नेत्यांचा प्रवेश हा केवळ आकड्यांचा नाही, तर डहाणू शहरातील राजकीय समीकरणे बदलणारा मानला जात आहे. हा पक्षप्रवेश केवळ शिवसेनाउद्धव बाळासाहेब ठाकरे, राष्ट्रवादी शरद पवार गट आणि काँग्रेससाठीच नाही, तर शिंदे गटाचा मित्रपक्ष असलेल्या भाजपसाठीही मोठी डोकेदुखी ठरू शकतो.

यामागचे कारण स्पष्ट आहे: डहाणू नगरपरिषदेच्या नगराध्यक्ष पदासाठी भाजपचे जिल्हाध्यक्ष भरत राजपूत हेच दावेदार मानले जात आहेत आणि त्यांनी या जागेवर आपला दावा मजबूत केला आहे. अशा परिस्थितीत, नगरपरिषदेतील वजनदार नेते राजू माच्छी यांचा शिंदे गटातील प्रवेश भाजपच्या जिल्हाध्यक्षांना मोठे राजकीय आव्हान निर्माण करणारा ठरला आहे.

राजू माच्छी आणि त्यांच्यासोबत आलेल्या पदाधिकाऱ्यांमुळे डहाणू नगरपरिषदेत आता शिवसेना शिंदे गट मजबूत स्थितीत आली आहे. त्यामुळे, आगामी नगरपरिषद निवडणुकीत शिंदे गट मित्रपक्षांना सोबत न घेता स्वबळावर निवडणूक लढवण्याची तयारी करत असल्याच्या जोरदार चर्चा सध्या डहाणूच्या राजकीय वर्तुळात सुरू झाल्या आहेत. माच्छी यांच्या प्रवेशामुळे शिंदे गटाची ताकद केवळ वाढली नाही, तर त्यांनी स्थानिक पातळीवर निर्णय घेण्याची क्षमताही सिद्ध केली आहे. राजू माच्छी यांच्या राजकीय अनुभवाचा आणि स्थानिक जनसंपर्काचा फायदा घेत शिंदे गट डहाणू नगरपरिषदेवर भगवा फडकवण्याचे स्वप्न पाहत आहे. एकूणच, या पक्षप्रवेशाने डहाणूचे राजकारण पूर्णपणे ढवळून निघाले असून, नगरपरिषद निवडणुकीत मोठी चुरस पाहायला मिळेल, यात शंका नाही.