प्रशांत महासागरात होणार मोठी हालचाल, भारतात हाडं गोठवणारी थंडी वाढणार, महाराष्ट्रात काय स्थिती?

यंदा ला नीनाचं संकट पुन्हा एकदा घोंघावत आहे. त्याचा परिणाम थंडी आणि उकाड्यावर होण्याची शक्यता आहे. महाराष्ट्रासह अनेक राज्यांमध्ये यंदा दरवर्षीपेक्षा यंदा जास्त थंडी राहण्याची शक्यता आहे. हाडं गोठवणारी थंडी यंदा महाराष्ट्रात राहू शकते. अमेरिकी राष्ट्रीय हवामान सेवेच्या जलवायू पूर्वानुमान केंद्राने वर्तवलेल्या अंदाजानुसार ला नीना विकसित होण्याचे चान्सेस 71 टक्के आहेत. डिसेंबर 2025 ते फेब्रुवारी 2026 या कालावधीमध्ये त्याचा प्रभाव अधिक जास्त दिसून येईल. त्यानंतर हळूहळू कमी होण्याची शक्यता आहे.

ला नीनामुळे भूमध्यरेखीय प्रशांत महासागरातील वातावरणात मोठा बदल होतो. त्यामुळे समुद्राचं आणि त्यावरुन वाहणाऱ्या वाऱ्यांचं तापमानही बदलतं. त्याचा परिणाम जगभरात होत असतो. भारतात या वाऱ्यांमुळे थंडी वाढण्याची दाट शक्यता आहे. ऑक्टोबर ते डिसेंबर दरम्यान ला नीना 50 टक्के विकसित होण्याची शक्यता आहे. त्यामुळे सर्वात जास्त थंडी आणि सर्वात जास्त उष्णता यावेळी असणार अशी शक्यता हवामान विभागाकडून वर्तवण्यात आली आहे.

स्कायमेट वेदरचे अध्यक्ष जीपी शर्मा यांच्या म्हणण्यानुसार आपण ला नीनाकडे दुर्लक्ष करून चालणार नाही. प्रशांत महासागरातून आधीच सामान्य ते थंड वारे वाहतात. ला नीना सध्या जरी सक्रिय झालं नसलं तरी जर समुद्राच्या पृष्ठभागाचं तापमान -0.5 डिग्रीहून कमी झालं तर ते तापमान पुढचे दोन ते तीन महिन्यांपर्यंत तसंच राहण्याची शक्यता आहे. असं झालं तर ला नीनाचा इफेक्ट म्हणू शकतो. 2024 अखेरीस ला नीनाची स्थिती तयार झाली होती. मात्र दीर्घकाळ राहिली नाही.

शर्मा म्हणाले की, पॅसिफिक महासागरात सुरू असलेली थंडी जागतिक हवामानावर परिणाम करू शकते. जर ला निना आलं तर अमेरिका आधीच कोरड्या हिवाळ्यासाठी सतर्क आहे, असे ते म्हणाले. भारतात, थंड पॅसिफिक पाण्यामुळे सामान्यतः अधिक कडक हिवाळा येतो आणि विशेषतः उत्तरेकडील आणि हिमालयीन प्रदेशात हिमवर्षाव होण्याची शक्यता जास्त असते. यंदा हिमवृष्टीही लवकर होणार का असाही प्रश्न पडला आहे.