भाजपचा मुख्यमंत्री होणार, कुणाला किती मंत्रिपदं? सत्ता वाटपाचा फॉर्म्युला कसा? मोठी माहिती समोर

महायुतीचं सरकार स्थापनेपूर्वी तिन्ही पक्षात सत्तावाटपाचा फॉर्म्युला ठरल्याचं बोललं जातंय. विधानसभेतील संख्याबळानुसार महायुतीतील प्रमुख तीन घटक पक्षांमध्ये सत्ता वाटप होणार आहे.

भाजपच्या वाट्याला 25 मंत्रिपदं, शिंदेंच्या शिवसेनेला 10 मंत्रिपदं तर तर अजितदादांच्या राष्ट्रवादीला 7 मंत्रिपदं मिळणार असल्याचं बोललं जातंय. न्यूज १८ लोकमतला सूत्रांनी ही माहिती दिली.

स्पष्ट बहुमत मिळूनही निकालानंतरच्या चौथ्या दिवशीही महायुतीत मुख्यमंत्रिपदाचा चेहरा ठरत नसल्याने अंतर्गत कुरबुरींची माध्यमांत जोरदार चर्चा रंगली होती. एकनाथ शिंदे यांच्याकडून पुन्हा मुख्यमंत्रिपद मिळावे, यासाठी दबावतंत्राचा वापर सुरू असल्याचेही बोलले गेले. गेली चार दिवस एकनाथ शिंदे माध्यमांपासून दूर होते. अखेर बुधवारी एकनाथ शिंदे यांनी आपली भूमिका स्पष्ट केली. महायुतीने गेल्या अडीच वर्षात जनतेच्या हितासाठी काम केले त्यामुळे आम्हाला स्पष्ट बहुमत मिळाले. सरकार बनविण्यात आमचा कोणताही अडथळा असणार नाही, असे मोदी-शाह यांना फोन करून कळविल्याचे एकनाथ शिंदे यांनी सांगितले. तसेच मुख्यमंत्रिपदावर अंतिम निर्णय घेण्याचे सर्वाधिकार मोदी-शाह यांना असल्याचे त्यांनी आवर्जून सांगितले. एकप्रकारे त्यांनी मुख्यमंत्रिपदावरील दावा सोडत असल्याचे संकेत दिले.