नाशिकचा पराभव जिव्हारी लागला! निवडणुकीनंतर राज ठाकरे अॅक्शन मोडवर, हा मोठा निर्णय घेण्याच्या तयारीत

या बैठकीत निवडणुकीतील पराभवाची नेमकी कारणे, प्रचारातील त्रुटी, मतदारांपर्यंत पोहोचण्यात आलेल्या अडचणी तसेच भविष्यात कोणत्या पद्धतीने काम करावे, यावर सखोल चर्चा करण्यात आली. उमेदवारांनी आपले अनुभव, अडचणी आणि निरीक्षणे मोकळेपणाने मांडली. या बैठकीचा सविस्तर आढावा पक्षप्रमुख राज ठाकरे यांच्याकडे पाठवण्यात येणार असून, लवकरच ते नाशिकमधील सर्व उमेदवार आणि पदाधिकाऱ्यांची प्रत्यक्ष भेट घेणार असल्याची माहिती बैठकीत देण्यात आली.

प्रदेश उपाध्यक्ष सलीम मामा शेख आणि अ‍ॅड. रतनकुमार इचम यांनी बैठकीत सर्व उमेदवारांचे मनोगत ऐकून घेतले. प्रचारादरम्यान कोणत्या पातळीवर कमतरता राहिली, कुठे संघटनात्मक समन्वय कमी पडला, याबाबत त्यांनी सविस्तर चर्चा केली. या सर्व मुद्द्यांचा अहवाल तयार करून तो थेट राज ठाकरे यांच्याकडे पाठवण्यात येणार आहे.

या पराभवामुळे पक्षांतर्गत मोठे बदल होण्याची शक्यता वर्तवली जात आहे. संघटनेतील काही पदाधिकाऱ्यांच्या कामगिरीचा आढावा घेऊन जबाबदाऱ्यांमध्ये बदल केले जाऊ शकतात, असे संकेत बैठकीतून मिळाले आहेत. राज ठाकरे स्वतः उमेदवारांशी संवाद साधून पुढील दिशा आणि पक्षाची रणनीती निश्चित करणार असल्याचेही स्पष्ट झाले आहे.