Ganesh Chaturthi 2025: कलेला नसतं धर्म-जातीचं बंधन! मुस्लिम कारागीर घडवतात बाप्पासाठी ढोल

छत्रपती संभाजीनगर: येत्या 27 ऑगस्ट रोजी सर्वांच्या लाडक्या गणपती बाप्पाचं आगमन होणार आहे. त्यासाठी सध्या गणेश भक्तांची जोरदार तयारी सुरू आहे. यंदाचा गणेशोत्सव दणक्यात कसा साजरा करता येईल, यासाठी प्रत्येकजण प्रयत्नशील आहे. ढोल-ताशांचा नाद हा गणेशोत्सवाचा आत्मा मानला जातो. बाप्पाच्या आगमनापासून ते विसर्जनापर्यंत संपूर्ण वातावरण दणाणून टाकणाऱ्या या ढोलांच्या निर्मितीला फक्त हिंदूंचाच नव्हे तर मुस्लिम बांधवांचाही हातभार असतो. छत्रपती संभाजीनगर शहरातील अनेक मुस्लिम कारागीर कित्येक वर्षांपासून भक्तिभावाने बाप्पासाठी ढोल तयार करतात.