भाजपमध्ये जाणार नाही, चर्चा बंद करा, अशोक चव्हाण यांच्या निकटवर्तीय आमदाराला असे का सांगावे लागतेय?

त्याचवेळी मी काँग्रेसमध्येच राहणार असून भाजपमध्ये जाणार नाही, असा शब्द देतानाच माझ्यावर क्रॉस व्होटिंगचा खोटा आरोप लावण्यात आल्याचेही ते म्हणाले. मी क्रॉस व्होटिंग केली नव्हती, हे मी पक्षातील वरिष्ठांना सांगितले. त्यानंतर मला कुठलीही नोटीस आली नाही आणि विचारणाही झाली नसल्याचे हंबर्डे यांनी सांगितले. त्याचवेळी माध्यमं माझ्याबाबत खोटी माहिती चालवत असल्याचा आरोपही त्यांनी केला.

मोहन हंबर्डे हे काँग्रेस पक्षाचे नांदेड दक्षिणचे आमदार आहेत

लोकसभा निवडणुकीत जनतेने भाजपला नाकारल्यानंतर नांदेड जिल्ह्यातील विधानसभा मतदारसंघातही परिवर्तनाचे वारे वाहू लागले आहेत. सूर्यकांता पाटील यांनी भाजपला रामराम ठोकून राष्ट्रवादी शरद पवार गटात प्रवेश केला. त्यानंतर अशोक चव्हाण यांचे सख्खे दाजी भास्करराव पाटील खतगावकर यांनीही भाजपला सोडचिठ्ठी देण्याचे ठरवून दोन दिवसांत ते काँग्रेसमध्ये प्रवेश करतील. त्यांच्यासोबत त्यांची सून मीनल पाटील खतगावकर देखील काँग्रेसमध्ये प्रवेश करणार आहेत. नायगाव विधानसभा मतदारसंघातून त्या विधानसभा निवडणूक लढवतील, अशी चर्चा आहे. अशोक चव्हाण भाजपमध्ये गेल्यानंतर त्यांच्यासोबत जिल्ह्यातील बहुतांश काँग्रेस आमदार जातील, असे बोलले गेले. मात्र नांदेडच्या जनतेने भाजपला नाकारल्यानंतर आमदारांनीही आस्ते कदमचा पवित्रा घेतला आहे.