Nashik News: त्र्यंबकेश्वर मंदिरात सुरक्षा रक्षकांची दादागिरी, भाविकाला कपडे फाटेपर्यंत मारहाण; Video Viral

अनेकदा गर्दीच्या वेळी सुरक्षारक्षकांमध्ये आणि भाविकांमध्ये जोरदार वाद होतानाच्या घटना आपण पाहिल्या आहेत. त्याचप्रमाणे तीर्थक्षेत्र असलेल्या त्र्यंबकेश्वरच्या मंदिरामध्ये भाविकांमध्ये आणि सुरक्षा रक्षकांमध्ये तुंबड हाणामारी झाली आहे. दर्शनासाठी रांगेत उभ्या असलेल्या एका भाविकाला सुरक्षा रक्षकांकडून ढकलाढकली करत लाथाबुक्क्यांनी मारहाण करण्यात आल्याचे दोन व्हिडिओ सध्या सोशल मीडियावर तुफान व्हायरल होत आहे. मंदिरातील घटनेचा व्हिडिओ पाहून भाविकांमध्ये संतापाची लाट उसळली आहे.

मंदिरामध्ये दर्शनासाठी आलेल्या काही भाविकांनी हा व्हिडिओ आपल्या मोबाईलमध्ये शूट करून घेत त्यांनी सोशल मीडियावर व्हायरल केला आहे. सध्या मंदिरातल्या हाणामारीचा व्हिडिओ सोशल मीडियावर तुफान व्हायरल होतोय. जर मंदिरामध्येच भाविकांना योग्य ती वागणूक मिळत नसेल, तर कसं काय होणार? असा सवाल उपस्थित केला जात आहे. शनिवार, रविवार, सोमवारी होळी आणि मंगळवारी धुलिंवदन असे सलग चार दिवस सुट्ट्या आल्यामुळे त्र्यंबकेश्वरमध्ये दर्शनासाठी भाविकांची मोठी गर्दी झाली आहे.

भाविकांची त्र्यंबकेश्वरच्या मंदिरामध्ये एकच गर्दी झाल्यामुळे भाविकांना रांगेत उभे राहण्यासाठी जमत नाहीये. गर्दी वाढल्यामुळे मंदिराच्या व्यवस्थापनावर ताण वाढला आहे. मंदिरामध्ये सुरक्षा रक्षकांकडून भाविकांसोबत उद्धटपणे वागणं, ही काही पहिली वेळ नाही. यापूर्वीही अनेकदा मंदिरामध्ये उद्धटपणे भाविकांना वागणूक मिळाली आहे. दरम्यान, अनेक भाविकांकडून गर्दी नियंत्रण करताना भाविकांशी गैरवर्तन होणे योग्य नसल्याची भावना व्यक्त केली जात आहे. दरम्यान, घडलेल्या प्रकरावर मंदिर प्रशासन काय म्हणतं? हे पाहणं महत्त्वाचं ठरणार आहे. शिवाय, भाविकांकडून या प्रकरणी सुरक्षा रक्षकांवर कारवाई करण्याची मागणी करण्यात आली आहे.