आरक्षणाचा प्रश्न चिघळला, बंजारा समाजातील तरूणाने उचललं टोकाचे पाऊल

धाराशिव :  महाराष्ट्रात सध्या ओबीसी आणि मराठा आरक्षणावरुन मोठा वाद सुरु झाला आहे. राज्य सरकारने हैदराबाद गॅझेटला मंजुरी दिल्यानंतर आता मराठा समाजाला कुणबी प्रमाणपत्र मिळणं शक्य झाले आहे. मात्र या कारणामुळे सध्या ओबीसी समाजात आरक्षणावरुन भीतीचे वातावरण निर्माण झाले आहे. दरम्यान आरक्षणाच्या मागणीसाठी आंदोलन आणि रास्ता रोको सुरु असतानाच मुरूम शहरालगत नाईक नगर तांडा येथे 32 वर्षीय तरुणाने गळफास घेऊन आत्महत्या केल्याची धक्कादायक घटना घडली आहे. पवन गोपीचंद चव्हाण असे मृत व्यक्तीचे नाव असून त्याने आत्महत्येपूर्वी लिहिलेल्या चिठ्ठीत 'मुख्यमंत्री साहेब, बंजारा समाजाला हैदराबाद गॅझेट प्रमाणे अनुसूचित जमातीमध्ये आरक्षण द्या', अशी मागणी त्याने केली आहे. या घटनेमुळे परिसरात हळहळ व्यक्त होत आहे.