महायुतीत पहिली फूट! जळगावात शिंदे गटानंतर भाजपच्या नेत्याकडूनही स्वबळाची घोषणा, तातडीच्या बैठकीत निर्णय

यानंतर आता महायुतीत निवडणुकीआधीच राजकीय फटाके फुटायला सुरुवात झाली आहे. जळगावच्या पाचोरा भडगावमध्ये निवडणुकीपूर्वीच युती फिसकटली आहे. शिवसेना शिंदे गटाचे आमदार किशोर पाटील यांनी अलीकडेच स्वबळावर निवडणूक लढवण्याची घोषणा केली होती. यानंतर भाजपने देखील तातडीची बैठक घेऊन स्वबळावर निवडणूक लढवण्याचे जाहीर केले.

यामुळे जळगाव जिल्ह्यात महायुतीतील राजकीय वातावरण तापले आहे. पाचोरा-भडगाव मतदारसंघात शिवसेना आणि भाजपचा जाहीरपणे स्वतंत्र निवडणुका लढण्याचा हा राज्यातला पहिला निर्णय आहे. त्यामुळे राज्यात इतर जिल्ह्यात नेमकं काय होणार? तिन्ही पक्ष एकत्र लढणार की सगळीकडे जळगाव पॅटर्न राबवला जाणार? याकडे सर्वांचं लक्ष लागलं आहे.

पाचोरा-भडगाव मतदार संघाचे शिवसेना शिंदे गटाचे आमदार किशोर पाटील यांनी काही दिवसांपूर्वी पाचोरा भडगाव येथील नगरपालिका, जिल्हा परिषद आणि पंचायत समितीच्या निवडणुका स्वबळावर निवडणूक लढवण्याचे जाहीर केलं होतं. यानंतर भाजपच्या वतीने चाळीसगावचे आमदार मंगेश चव्हाण यांनी तातडीने बैठक घेऊन भाजपही स्वबळावर लढणार असल्याचे जाहीर केले. त्यामुळे निवडणुका घोषित होण्यापूर्वीच पाचोरा-भडगाव मतदारसंघात युती फिसकटली असून युतीत निवडणुका न लढण्याचा निर्णय घेणारा पाचोरा मतदारसंघ हा राज्यात पहिला ठरला आहे. दरम्यान, पाचोरा भडगावच्या निमित्ताने महायुतीतील वातावरण मात्र जिल्ह्यात चांगलेच आपले असल्याचे बघावयास मिळत असून महायुतीमध्ये राजकीय फटाके फुटायला सुरुवात झाली आहे.