सरकारकडून कोल्हापूरकारांची फसवणूक! 'शक्तिपीठ'विरोधात पुन्हा रान पेटणार, सतेज पाटील अन् राजू शेट्टी आक्रमक

सतेज पाटील यांनी यांसदर्भात गुरुवारी एका प्रसिद्धीपत्रकातून सरकारवर आरोप केलेले आहेत. त्यांनी पुढे म्हटले आहे की, शक्तिपाठ महामार्गाबद्दल शासनाने नवा अध्यादेश काढला आहे. त्यात कोल्हापूर जिल्ह्यातील रेखांकनाबद्दलचा उल्लेख आहे. महायुतीच्या नेत्यांनी आणि आमदारांनी निवडणुकीच्या आधी 'आम्ही हा महामार्ग रद्द करणार', असा शब्द दिला होता. पण आता त्यांनीही शब्द फिरवला आहे, असे अध्यादेशातून स्पष्ट होते. आदेशातील मुद्दा क्रमांक 3 मध्ये ऑक्टोबरची अधिसूचना रद्द करत असल्याचा स्पष्ट उल्लेख करण्यात आला आहे.

स्वाभिमानी शेतकरी संघटनेचे अध्यक्ष राजू शेट्टी यांनीही प्रसिद्धीपत्रक काढून सरकारवर निशाणा साधला आहे. शेट्टी म्हणाले की, "शक्तिपीठ महामार्गाच्या भूसंपादनास मान्यता देऊन सरकारने जनतेची आणि शेतकऱ्यांची दिशाभूल केली आहे. तरीही आम्ही राज्यभरात शक्तिपीठीस तीव्र विरोध करणारच आहे. शिवाय कोल्हापूर जिल्ह्यात एकही नवीन मार्गही होऊ देणार नाही", असा इशारा शेट्टी यांनी दिला आहे.