कोणी विचारही केला नसेल! तन्वी-सोनालीला पछाडून 'या' स्पर्धकाने मारली बाजी, ठरली 'बिग बॉस मराठी 6'ची पहिली कॅप्टन!

रितेश देशमुखच्या 'बिग बॉस मराठी ६' च्या घरात सध्या वादाचे ढग असले, तरी एका गोड आवाजाच्या स्पर्धकाने मात्र आपल्या बुद्धीच्या जोरावर संपूर्ण घराची कॅप्टन्सी मिळवली आहे. ती म्हणजे प्राजक्ता शुक्रे.

२००४ सालात 'इंडियन आयडॉल'च्या पहिल्या सीझनमध्ये अभिजीत सावंतला तगडी टक्कर देणारी ही मुलगी, आज बिग बॉस मराठी ६ च्या घराची पहिली 'कॅप्टन' म्हणून मिरवणार आहे.

कॅप्टन्सीचा हा पहिलाच टास्क अत्यंत मजेशीर आणि चुरशीचा होता. तन्वी कोल्ते, प्राजक्ता शुक्रे, सोनाली आणि अनुश्री माने यांच्यात ही लढत रंगली होती. टास्कचं नाव होतं 'बीबी फार्म'. दोन टीम्स करण्यात आल्या होत्या, 'ए टीम'मध्ये अनुश्री आणि सोनाली होत्या, तर 'बी टीम'मध्ये तन्वी आणि प्राजक्ता.

ज्या टीमच्या मेंढ्यांमध्ये जास्त कापूस असेल, त्यांना विरुद्ध टीमच्या एका सदस्याला नॉमिनेट करण्याची संधी मिळणार होती. पण इथेच खरा ट्विस्ट होता, नॉमिनेट झालेल्या सदस्याला वाचण्यासाठी बिग बॉसने एक गुपित ओळखण्याचं आव्हान दिलं होतं.

पहिल्या फेरीत प्राजक्ताची टीम जिंकली. त्यांनी अनुश्रीला टार्गेट केलं, पण अनुश्रीने गुपित ओळखलं आणि तन्वीलाच बाहेरचा रस्ता दाखवला. दुसऱ्या फेरीत पुन्हा प्राजक्ताची टीम सरस ठरली, पण यावेळी मात्र अनुश्रीला गुपित ओळखता आलं नाही आणि ती बाद झाली. आता मैदानात उरल्या होत्या सोनाली आणि प्राजक्ता.

तिसऱ्या राउंडमध्ये सोनालीच्या टीमने बाजी मारली आणि त्यांनी प्राजक्ताला बाद करण्याची खेळी खेळली. मात्र, प्राजक्ताने शांत डोकं ठेवलं. बिग बॉसने ऐकवलेलं गुपित कोणाचं आहे, हे तिने अचूक ओळखलं आणि सोनालीला टास्कमधून आऊट केलं. या निर्णायक क्षणी प्राजक्ताने आपल्या अनुभवाचा आणि निरीक्षणाचा असा काही वापर केला की, ती घराची पहिली महिला कॅप्टन बनली.

प्राजक्ता शुक्रे हे नाव मराठी घराघरांसाठी नवीन नाही. ज्यावेळी देशात रिॲलिटी शोचं वारं आलं होतं, तेव्हा 'इंडियन आयडॉल'च्या पहिल्याच पर्वात प्राजक्ता फायनलिस्ट होती. तिथे विजेता ठरलेल्या अभिजीत सावंतशी तिची मैत्री आणि चुरस आजही प्रेक्षकांच्या लक्षात आहे. योगायोगाने आज ती पुन्हा एकदा एका मोठ्या रिॲलिटी शोमध्ये आपली ताकद दाखवत आहे.

प्राजक्ता कॅप्टन झाल्यामुळे तिला काही विशेष अधिकार मिळाले आहेत. आता घरातील कामांचं वाटप करणं आणि नियमांचं पालन करून घेणं ही तिची जबाबदारी असेल. तन्वी आणि सागर कारंडे यांच्यातील वादात प्राजक्ता आता कोणती भूमिका घेते, हे पाहणं रंजक ठरेल.<span style="font-size: 20px;"> </span>