Palghar: PMFBY योजनेत शेतकऱ्याच्या खात्यात फक्त 2 रुपये 30 पैसे कसे आले? शेवटी जिल्ह्याधिकाऱ्यांनी दिलं स्पष्टीकरण

पालघर:  अवकाळी पावसामुळे राज्यभरात शेतकऱ्यांचं कंबरड मोडलं असतानाच पालघरमध्ये सरकारकडून एका शेतकऱ्याच्या जखमेवर मीठ चोळवण्यात आल्याचा धक्कादायक प्रकार समोर आला आहे. नुकसान भरपाई म्हणून या शेतकऱ्याला फक्त दोन रुपये तीस पैसे मिळाले असून यामुळे या शेतकऱ्याकडून संताप व्यक्त करण्यात येत आहे. पण, या प्रकरणावर जिल्ह्याधिकाऱ्यांनी स्पष्टीकरण दिलं आहे. ही रक्कम मागील वर्षीची असल्याचं सांगितलं आहे.

दरम्यान, पालघरमधील वाडा तालुक्यातील नुकसानग्रस्त शेतकऱ्याला शासनाकडून आलेल्या २ रुपये ३० पैशांच्या मदतीवर आता जिल्हा प्रशासनाकडून खुलासा करण्यात आला आहे. मधुकर पाटील यांना मिळालेली दोन रुपये तीस पैसे मदत ही चालू वर्षाची नसून मागील वर्षीची शिल्लक रक्कम असल्याच स्पष्टीकरण जिल्हा प्रशासनाकडून देण्यात आलं आहे. 2022 - 23 च्या नुकसानीची मदत मधुकर पाटील यांना मागील वर्षी 72,466 रुपये मंजूर करण्यात आली यापैकी ७२,४६४ रुपये मधुकर पाटील यांना 11- 5 -2024 रोजी म्हणजेच मागील वर्षी देण्यात आले होते.