MPSC Student Protest : पुण्यात MPSC विद्यार्थ्यांची अचानक आंदोलनं का? पोलीस तपासात समोर आली धक्कादायक माहिती

रस्ते बंद करणे , रात्री बेरात्री पोलिस ठाण्यासमोर हजारोंच्या संख्येने गोळा होऊन घोषणा देणे , आत्ताच निर्णय झाला पाहिजे नाहीतर उठणार नाही असं म्हणत आक्रमक होणे ही सध्याची एमपीएससीच्या विद्यार्थ्यांची पद्धत झाली. पोलिसांकडून मात्र भविष्यातले अधिकारी म्हणून कायदेशीर कारवाई करण्याऐवजी समजावून सांगण्यावर किंवा अगदी त्यांचे मुद्दे सरकारी पातळीवर पोहोचवण्यापर्यंत प्रयत्न करून पोलिसांनी ही आंदोलन संपवली. पण आता या आंदोलनांना वेगळाच वास येत आहे. ज्यात आपली पोळी भाजून घेण्यासाठी क्लासेसचालक पडद्यामागून सक्रिय होत आहेत. अगदी राजकीय पुढाऱ्यांना ही या आंदोलनात आणण्यासाठी उठाठेव ही त्यांनी केल्याच समोर आलं आहे.

कधी नवीपेठेत गोपीचंद पडळकर तर कधी रोहित पवार , कधी अतुल लोंढे तर कधी शरद पवार या विद्यार्थ्यांच्या आंदोलनाच्या ठिकाणी उपस्थित होतात. या आंदोलनाची वेळ ही रात्री-अपरात्री कोणत्याही क्षणी आंदोलने सुरू होतात. त्याशिवाय, आंदोलनाची ठिकाणे ही अलका टॉकीज चौक किंवा बालगंधर्व सारखी गर्दीच्या रहदारीची ठिकाणं असतात. कधी मागण्या योग्य, न्याय्य असल्याच्या दिसतात. तर कधी जाणीवपूर्वक शासनाला आयोगाला पेचात पकडनाऱ्या असतात. या विद्यार्थ्यांच्या आंदोलनांनी पुणे पोलिसांना हैराण केले होते. त्यामुळेच हे नक्की होतं कसं ? काही मिनीटात शेकडो काही वेळा हजारो विद्यार्थी गोळा कसे होतात याचा तपास पोलिसांनी केला आणि धक्कादायक माहिती समोर आली.