मालकाच्या लेकाने दादांना आव्हान दिले, सदाभाऊंचा फुल्ल सपोर्ट, रक्त काढल्याशिवाय म्यानात जायचं नाही!

मोहोळ नगराध्यक्षपदाच्या उमेदवाराच्या प्रचारार्थ सदाभाऊ खोत यांची शुक्रवारी मोहोळ सोलापूर येथे जाहीर सभा झाली. या सभेत त्यांनी राजन पाटील आणि त्यांचे चिरंजीव बाळराजे पाटील यांचे जाहीर अभिनंदन केले. सदाभाऊ खोत यांनी अजित पवार यांचे नाव न घेता त्यांना भिडण्याचाच सल्ला पाटील बापलेकाला दिला.

विजयाची पहिली सलामी ही अनगरने दिली. तुमच्या मुलाने कोणाला तरी चॅलेंज दिले मला बरे वाटले. त्यामुळे आले अंगावर तर घ्यायचे शिंगावर हा बाणा कायम ठेवा. राजन मालक तुमचा स्वभाव लढण्याचा आहे. तुमच्या मुलाचे मी जाहीर अभिनंदन करतो, कारण माझा पण आयुष्य वाऱ्यावर दगड मारण्यात गेले. आव्हान द्यायला मला जोडीदार मिळाला. म्यानातून तलवार काढल्यावर त्याला रक्त काढल्याशिवाय तलवार म्यानात ठेवायची नाही, असे सदाभाऊ खोत म्हणाले.

निवडणुकीमध्ये ज्यावेळी विजय मिळतो, त्यावेळी जिंकलेला योद्धा हा आनंदाने गर्जत असतो. 'नाद करा पण आमचा करू नका' हे म्हणायला का कोणाचे परमिशन काढावे लागती? त्यामुळे मला वाटत तो आनंदउत्सव असतो आणि तो सगळेच साजरा करतात. याचा कोणाला का राग यावा, कारण विजयाच्या धुंदीमध्ये सर्वच नाचत असतात, असे समर्थन करताना सदाभाऊ खोत म्हणाले.

अनगर नगर पंचायत निवडणुकीत राष्ट्रवादीच्या उमेदवार उज्ज्वला थिटे यांचा अर्ज बाद झाल्यानंतर बाळराजे पाटील यांनी जल्लोष साजरा केला. एका अर्थी त्यांच्या वहिनी प्राजक्ता पाटील यांच्या नगराध्यक्षपदासाठी वाट मोकळी झाली होती. त्यानंतर केलेल्या जल्लोषावेळी अजित पवार, कुणाचाही नाद करा पण अनगरकरांचा नाद करायचा नाही, असे म्हणत बाळराजे पाटील यांनी अजित पवार यांना आव्हान दिले होते. बाळराजे पाटील हे अजित पवार यांना आव्हान देत असल्याचा व्हिडीओ समाज माध्यमांवर जोरदार व्हायरल झाला आहे.