Ganeshotsav 2025: हिंदू-मुस्लिम ऐक्याची अनोखी परंपरा, सांगलीतील या 2 गावचा गणेशोत्सव ठरतोय लक्षवेधी

महाराष्ट्रातील इतर खेड्यांप्रमाणेच वाळवा तालुक्यातील गोटखिंडी येथे हिंदू आणि मुस्लिम बांधव गुण्यागोविंदाने राहतात. 1980 मध्ये येथील झुंजार चौकात गणेशोत्सव साजरा होत होता. त्यावर्षी सर्वत्र मोठा पाऊस होता. पाऊस इतका वाढला की गणपतीसाठी तयार केलेला निवारा पावसाने खराब झाला. बाप्पाची मूर्ती पावसाने भिजणार होती पाऊस काही उघडीपीच नाव घेत नव्हता. तेव्हा गावातील हिंदू-मुस्लिम बांधव एकत्र आले आणि सर्वानुमते निवाऱ्यासाठी गणपती मशिदीत बसवण्याचा निर्णय झाला. नैसर्गिक संकटाला हिंदू-मुस्लिम बांधवांनी एकत्रितपणे तोंड देत गणेश उत्सवाचा सांस्कृतिक ठेवा जपला. त्या घटनेमुळे सन 1980 पासूनचा गणेश उत्सव नेहमीच ‘मशिदीतील गणपती’ म्हणून हिंदू मुस्लिम एकतेचा संदेश देणारा ठरला.

“आमच्या गावात हिंदू-मुस्लिम संघर्ष असं कधीच घडलं नाही. लोकांची गैरसोय लक्षात घेऊन मी सेवा करायला सुरुवात केली. तेव्हापासून आज दहा वर्ष लोक मला भरभरून प्रेम देतात. माझ्या गाडीतून गणपती नेण्यासाठी लोक वाट पाहतात, फोनवर फोन करतात. "भैय्या आमचा गणपती सुद्धा तुमच्या गाडीतून घरी न्यायचा असल्याचे सांगतात". याशिवाय गावातील सार्वजनिक मंडळे आम्हाला आरतीसाठी निमंत्रित करतात. मी माझ्या घरी देखील गणपती बाप्पाची पूजा करतो. गेल्या वीस वर्षांपासून संकष्टीचा उपवास देखील करतो. गणपती ही बुद्धीची देवता मानली जाते. मनाच्या शांतीसाठी श्रद्धेने गणपतीची उपासना करण्यात मला माझा धर्म आठवण्याची गरज कधीच वाटली नाही, असं मुलाणी सांगतात.

“माझ्या मनात हिंदू मुस्लिम दोन्ही धर्मांबद्दल तितकीच श्रद्धा आहे. गुण्या गोविंदाने राहण्याची आपली संस्कृती आहे. माझा रिक्षातून गणपती नेत गावकरी माझ्याकडून बाप्पाची सेवा करून घेतात याचा मला फार आनंद आहे. आपल्या श्रद्धेने देवाची सेवा करण्यात भीती वाटण्याचं कारण नाही. मी मुस्लिम म्हणून जन्माला आलो पण गणपतीची भक्ती करण्यात मला समाधान वाटते, तर ती मी करतो. मला कुणीही अडवण्याचा, नाकारण्याचा, द्वेषाचा अनुभव कधीच आला नाही. असा अनुभव सांगत येलूरचे रिक्षा चालक शफी मुलाणी एकोप्याने राहण्याचीच आपली परंपरा असल्याने भीती वाटण्याचं कारण नाही,” असे सांगतात.