खोटी कागदपत्रे अन् झाडांची कत्तल, गावकऱ्यांचा संताप, सांगलीत हे काय सुरूये?

सांगली:  शेतकऱ्यांना दिवसा वीज पुरवठा व्हावा म्हणून मुख्यमंत्री सौर कृषी वाहिनी प्रकल्प राज्यभर राबवला जातो आहे. यामध्ये सांगली जिल्ह्यातील 28 उपकेंद्रांचा समावेश आहे. या अंतर्गत शिरसगावमध्ये सौर ऊर्जा प्रकल्प उभारणीचे काम सुरू करण्यात आले आहे. मात्र, या सौर प्रकल्पाच्या प्रस्तावामध्ये खोटी कागदपत्रे सादर करून गावची फसवणूक करत, बेकायदा वृक्षतोड केल्याचा आरोप गावकऱ्यांनी केला आहे. तसेच हा प्रकल्प रद्द करण्याच्या मागणीसाठी गावाचे माजी सरपंच सतीश मांडके हे गेल्या 6 दिवसांपासून उपोषणाला बसले आहेत.

सौर ऊर्जा प्रकल्पाबाबत अधिकारी आणि कंपन्यांच्या कारभाराविरोधात ग्रामस्थांनी एकत्र येत आवाज उठवला असून आंदोलनास श्रमिक मुक्ती दलाचे डॉ. भारत पाटणकर आणि दलित महासंघाचे प्रा. मच्छिंद्र सकटे यांनी देखील पाठिंबा दिला आहे. शिरसगाव येथे सौर प्रकल्पासाठी पर्यायी जागा असताना याच जागेचा अट्टहास का? सौर ऊर्जेची गरज आहे. पण लोकांच्या भावनाही तितक्याच महत्वाच्या आहेत, असं डॉ. पाटणकर यांनी म्हटलंय.

डॉ. भारत पाटणकर म्हणाले, “शिरसगावकरांच्या आंदोलनामध्ये उपस्थित झालेला मुद्दा हा सार्वजनिक मालमत्तेचा आहे. गायरान हे सार्वजनिक मालमत्तेपैकी एक असून त्याचा उपयोग सर्वसामान्यांसाठी वंचितांच्या कल्याणासाठी झाला पाहिजे. मात्र गेल्या काही दिवसांपासून अनेक ठिकाणी मनमानी सुरू असून जनसामान्यांचा विचार न करता विकासाच्या नावाखाली रेटारेटी सुरू असलेली दिसते. यावरून हवा आणि सूर्यप्रकाश देखील कोणाचा ताब्यात देत आहेत की काय असे वाटू लागले आहे. स्थानिक आणि सामान्य लोकांना त्रास देऊन सरकार कोणाचा विकास करू इच्छित आहे?” असा सवाल देखील डॉ. पाटणकर यांनी उपस्थित केला.

सौर प्रकल्पासाठी पर्यायी जागा असताना याच गायरानावरती प्रकल्प उभारणीस गावकऱ्यांचा विरोध आहे. दरम्यान 30 वर्षांपासून जगवलेल्या झाडांची बेकायदेशीर कत्तल झाल्याचा निषेध करत ग्रामस्थांनी शेकडो झाडांचे नव्याने वृक्षारोपण केले आहे. लोक भावनांकडे कानाडोळा करत प्रकल्प रेटल्यास तीव्र आंदोलनाचा इशारा शिरसगावकरांकडून देण्यात आला आहे.