ठाकरे बंधू एकत्र येण्याचं ठिकाण ठरलं! वेळ ठरली, संजय राऊत-बाळा नांदगावकर यांची गुप्त भेट

मुंबई : हिंदीसक्तीच्या विरोधात महाराष्ट्रातील सर्वच क्षेत्रातून उमटलेले पडसाद लक्षात घेऊन आगामी महापालिका निवडणुकीत जनमत विरोधात जाऊ नये, याची काळजी घेऊन सरकारमधील पक्षांनी शासन अध्यादेश रद्द करत असल्याची घोषणा केली. त्यामुळे मराठीच्या मुद्द्यावरून ठाकरेंचे जुळालेले सूर पाहता ५ तारखेचा मोर्चा होणार की नाही, असा प्रश्न सगळ्यांनाच होता. परंतु उद्धव ठाकरे यांनी लगोलग पत्रकार परिषद घेऊन जल्लोष मोर्चाच्या आयोजनाची घोषणा केली. मनसे अध्यक्ष राज ठाकरे यांच्याकडूनही त्यांना सकारात्मक प्रतिसाद मिळाला. याच पार्श्वभूमीवर शिवसेना नेते खासदार संजय राऊत आणि राज ठाकरे यांचे अतिशय विश्वासू सहकारी, मनसे नेते बाळा नांदगावकर यांची गुप्त भेट झाली. या भेटीत राज ठाकरे आणि उद्धव ठाकरे यांना एकत्र आणणारा मंच ठरला आहे.