मासेमारीवेळी जाळे टाकताना तोल गेला, टीमचं दिवसभर शोधकार्य सुरू होतं पण....

तापोळ्याच्या आपटीमधील किसन धोंडीबा कदम हे शिवसागर जलाशयात शुक्रवारी रात्री साधारण सात ते आठ वाजताच्या सुमारास बोटीतून मच्छीमारीसाठी निघाले. जाळे टाकत असताना त्यांचा तोल जाऊन ते पाण्यात बुडाले. काहीच वेळात ही बातमी गावात पसरली.

घटनेबाबत माहिती गावचे पोलिस पाटील शामराव गायकवाड यांनी पोलिसांना अवगत केले. त्यानंतर आज सकाळपासून स्थानिक नागरिकांनी शोधकार्य सुरू केले होते. तापोळा खोऱ्यातील अनेक नागरिक शोधकार्यात सहभागी झाले होते. अनेकांनी बोटीच्या सहाय्याने शोध घेण्याचा प्रयत्न केला. मात्र बेपत्ता कदम मिळून आले नाहीत.

सकाळी अकराच्या सुमारास महाबळेश्वर, सह्याद्री आणि शिवेंद्रसिंहराजे भोसले रेस्क्यू टीमचे जवान घटनास्थळी दाखल झाले. या टीमनेही कदम यांचा शोध घेतला मात्र त्यांच्या शोधकार्यालाही यश आले नाही. सायंकाळी उशिरा हे शोधकार्य रेस्क्यू टीमने थांबवले.

तापोळा खोऱ्याला कोयनेच्या शिवसागर जलाशयाने वेढा दिला आहे. इथला मुख्यत्वे भर भातशेती आणि पर्यटनावर असतो. शेतीला जोडधंदा म्हणून अनेक जण मासेमारी करतात. मासेमारी करत असतानाच शुक्रवारी रात्री कदम पाण्यात बुडाले.