Satara Police Bharti 2024 : बाहेरच्या जिल्ह्यातील उमेदवारांची गैरसोय टळणार, याठिकाणी झाली राहण्याची सोय

यावेळी त्यांनी सांगितले की, सातारा जिल्हा पोलिस दलाच्या वतीने 235 पदांसाठी 19 तारखेला बुधवार पासून भरती प्रक्रिया राबविण्यात येणार आहे. सातारा पोलिस दलात 235 पदांमध्ये 39 पदे ही चालक पदासाठी आहेत. तर पोलीस कॉन्स्टेबल व बँड वादकांसाठी एकूण 196 पदे आहेत. सकाळी 7 वाजल्यापासून ते सायंकाळी उशिरापर्यंत भरती प्रक्रिया चालेल. साताऱ्यातील पोलिस कवायत मैदानावर ही भरती प्रक्रिया राबवली जाणार आहे. सातारा पोलिस दलातील विविध पदांसाठी तब्बल 1 लाख 3 हजार ३० उमेदवारांनी अर्ज भरले आहेत.

उमेदवारांनी साताऱ्यासह अन्य जिल्ह्यांमध्ये प्रवेश भरतीसाठी अर्ज केला असल्यास आणि एकाच दिवशी अन्य ठिकाणची मैदानी चाचणी असल्यास त्या उमेदवारांना दुसरी तारीख देण्यात येईल. असे कोण उमेदवार असतील त्यांनी तत्काळ कळवावे, असे आव्हानही पोलीस अधीक्षक समीर शेख यांनी उमेदवारांना केले आहे.

त्याचबरोबर कागदपत्रांची छाननी झाल्यानंतर शारीरिक क्षमता चाचणी, तसेच 1600 मीटर धावणे, 100 मीटर धावणे व गोळाफेक अशा निकषांमधून पार पडलेल्या उमेदवारांची पोलीस दलाच्या संकेतस्थळावर गुणवत्ता यादी प्रसिद्ध केली जाणार आहे.

बाहेर जिल्ह्यातून येणाऱ्या युवकांच्या निवासाची गैरसोय मोठ्या प्रमाणात होते. त्यासाठी पोलीस करमणूक केंद्राचा हॉल, शाहू स्टेडियम या ठिकाणी मैदानी चाचणीच्या एक दिवस अगोदर निवासाची सोय करण्यात आली आहे. पोलिस दलाने केलेल्या या उपाययोजनेमुळे गरजू मुलांची गैरसोय दूर होणार आहे. जर कोणत्याही प्रकारची अडचण आल्यास सातारा जिल्ह्यातील हेल्पलाइन नंबर वर संपर्क साधण्याचे देखील आव्हानही सातारा जिल्ह्याचे पोलीस अधीक्षक समीर शेख यांनी केला आहे.